Hruaibona thlarauvin rei tak min zial hnu-ah ka harh ta. Chu thlarau chu, ka chhehvela khawvelin dik leh tha leh mawi nia thil thar a rawn tawktarh avanga ka suangtuahna lungphum tihdanglama a awmna hi a ni. He sala tang tamtak awm vea ka rin avangin, khawnge, ka testimony kan sawi dawn teh ang.

            Ram:
            A tira ka ngaihdanah chuan ka thianpa Ramhmangaiha, Hnam Chhantu hotupa hi mi â a ni. A chang leh hmunphiah vilikin khawpui kawng a zawh a. Mi chhuanawm an awmin, miten pangpar thi an awrhtir laiin, ani chuan a hmunphiah siam a lektir ve ziah a. Thu a sawi apiangin, "Ram thianghlim, Mizoram hmingin chibai ka buk a che u," tiin a thusawi bul a tan thin. "Hetia i tih zel chuan kawm tlak lovah i chhuak vat dawn e," ka tih rilruk laiin, Hepa hian mi phet thlu a, mi bawh bet ta tlat. Kan mikhual â zawk kha a lo fing leh zawk e!" an tih ang maiin, Mi â nia ka ngaih kha mi fing a ni a, mi â nia ngaitu kei hi ka lo â zawk a ni tih vawiinah hian khawvel hriatah, a ring thei ang berin ka puang e. He ram hi ram thianghlim a ni ti tlattu chuan, fianrialah pawh a dinna hmun thianghlim hi a uiresan thei lo. He hmun hi hmun thianghlim ni tlata ngaitu chuan, a awmna ram tan a thahrui leh remhriatna zawng zawng a hlan lo thei lo. High sikul atangin kan inkawp chhova, a fin fal vak pawh ka hre lo. Mahse, a awmna ram lakah a rinawm a ni. Engvangin nge a rinawm? A dinna leilung Mizoram khawilai pawh hi ani chuan pulpit angah a ngai tlat. Zan tamtak he thuruk hi ka ngaihtuah a. Pulpita ka din lai em hi chuan sual hi ka ngaihtuah lem lo va, pulpitah em hi chuan ka eiruk ka hre lo. Mahse, pulpit aia hmun tenawm hi he Mizoramah hian ka hmu tam ta lutuk a, chuvangin, nun uluk loh theihna hmun remchang ngah riauvin ka inhre mai mai a lo ni. Har ti hle mah ila, he ram, ka dinna leilung, Mizoram ngei hi Ramthianghlim a ni tih hi thinlunga pawm turin vawiinah hian ka lo intulut thar ve ta a ni.

            Tun atang chuan, Ramthianghlim hi Israel ramah zawn ka tum ta lo. Tlangval laia kan sak thin, "The green rolling hills of West Virginia" ai khan, Sakawrhmuituai tlang hi mawi ka ti zawk tur a ni. Alpine Hut ai chuan, kumhlui lova thlam ram hian ka lung a tileng zawk tur a ni. Tlawngdunga tiau chhum avang hian Lengpuiah thlawhna a lo tum thei lo a nih pawhin, tlawngdung tiau chhum hi ka deusawh ngai tawh lo vang.

            Ka nu
            Vanah Pa ka nei a, ka pianna ram hi hi ka nu a ni. A lui luang zawng zawngte hi ka nu thisen zam a nih hi. Vanrang chhum hi ka nu incheina a ni a, chhumin a khuh chhunga hausakna awm zawng zawng hi ka nu malsawmna a ni a, daihzai taka hmang tangkai thiam turin min duh a ni. Hnam dang laka ka him theih nan tlang hriam pik karah min thukru a. Ka lo chaka, ka damkhawchhuah theih nan tawng hran min pe a. Ka nu chhul chhuak ka ni tih hriat hran a nih theih nan, ze hran, nunphung hran leh, awmna hmun hran siamsak ka ni.

            Mahse, lo thanglianin ka han hawi vel a, fahrah ang maiin mahni nu aiin mi nu ka ngaisang a, ka nu ka sit a, a thiam tawka min lo duata min lo humhalhna zawng zawngte chu ngaihsan a hnehin ka hmusit a, awrawl tawpa min auh lawm lawm lai leh, thu tha min zirtir dawn apiangin, beng ka hupsan thin a lo ni. A chang phei chuan, "Ka nu" tia han koh thleng hian ka zak a, ka han chhuahvah nikhuaa, miten "Tunge i nu?" tia min zawh changte hian, Thailand leh Japan ram te hi ka nu angin ka kawk tan ta mai ka ti! Keima kawtkai ngeia tual ka han len chang pawh hian, ka nu fa ka an loh theihna dan tur ringawt ka ngaihtuah tawh a, Ka nu ka hmuhsit miau avangin, ka inbel leh ka incheina leh ka tawngkauchheh thleng hian, zilhtu nei lo khawlai fa ang maiin ka lo dahlau ta a ni.

            Aw! Ka nu, ngaihdam tlak ka nih chuan khawngaih takin min ngaidam teh aw. I hnute ringa, i mal chunga seilian ka ni a. Tun thleng hian, kan hmusit chung chung che hian, i hmangaihna thinlung chuan min la hnar phal lo va, i feh haw apiangin fen kawng bakbahaiah, dawrawn khatin ka lawmzawng i rawn phur haw a, i theih tawk leh i thiam tawk hi ka tan i chhuah a, "Mizo thil... a thing lutuk!" tiin i mi duhsakna te hi ka lo thehdarh vel thin a maw. Kawng chhukchhova ka chakkhai la tura i tlanvelna lama i chawn sek te hi a va mawi em! Zum leh hriam ka tauh palh lohna tura duat taka min kuahna lamah i bante hi a ser tek tuk tawh a. Min ngaihtuaha i rilru a hah avangin chaw kaw puar i ei lo va, zanah lah mutmu i tuah thei hek lo. Keimah vang hian i hmai a lo zur a, i sam a tuak a, i khaw hmuh te pawh a fiah lo zo ta. Hetih hnu pawha ka nu, duat nachang ka hre lo che hi chu e, hringtu hmangaihna thinlung nen lo chuan, ngaihdam tlak pawh hi ka ni tawh lo mai awm mang e.

            Tunah chuan, i laka rinawm turin ka intiam a, nangmah duata, ngaihlu a, rawngbawlsak tur chein ka intiam thar leh e. I hausakna sawr fu ka duh avang ringawt hian ka tlawn tawh dawn lo che a, min hringtu i ni a, min hmangaihtu i nih avang zawkin, hmangaih let ve che hi ka bat a ni tih ka hria. Vawi khat mah ka zahpui tawh lovang che'nga, chhuang takin ka hmangaihzia che hi ka lantir tawh dawn a ni.

            Nula leh Tlangval:
            Tunah Chuan ka thil thlirdan pawh a dang ta. TV-ah ka en a, sap nula pianthiam pui pui, sam buang ther thur, mitmu dumpawl riai ruai, saruak lek lek, mipa lem bak hna dang nei miah lo ang maia inhnawih vam huam mai te hian ka mit an lo la thin a. He mite khawsazia leh nunphung mil hian rei tak chhung nula hmeltha patla ka lo khai hman pek a. Mahse, engti maha tihdanglam loha lo zi chhuak, mizo nula fir hi hmeltha ka ti tur a ni. A chawn sek se, a hmai bawl se, a khan hniam se, ka mit tlun lohna sawmsarih pawh awm mah se, mizo nula a nih hrim hrimna avang hian, ka thinlungin mark a pe sang ngei ngei tur a ni. Keiin ka hnampui nulate hi tha ka tih lohin tunge tha ti se ka tih? Anni kalkana tuipuiral sap nula ka ngaihmelh tlat chuan, ka chipui nulate chu vai tlangvalin an kuah reng ang chu. Chuvangin, vawiin atang hian, ka mizopui nulate u, khawvelah nangni aia tha hi an awm lo. Inchei miah lo mah ula, in awm mai mai pawh hi in mipate tan hian tuar in har tawk em em a ni tih hi ka hrilh thar leh a che u.

            Chutiang bawkin nangni, tlangval te u, sap tlangval aiin in khan a hniam mai thei, an hriat zat in hre lo mai thei, an hak ang leh, an ei ang leh an khawsak phung ang in tlin ve loh avang hian, mizo nulate hian chhete pawhin kan sit lo a che u. Ruihhlo bawihah in tang a, thenkhatin zu in birh a, hlutna nei reng reng lo ang maia teirawlai mai mai in awm a nih pawhin, kan thlah phal lo cheu a sin. Nangni lo hi chi thlah tur tlangval dang kan nei hlei nem. Khawngaih takin beidawng suh u. Hetia Mizo tlangval in nih avang ringawt hian, tun atang chuan, in hmeichhiate mitah, khawvel tlangval dang zawng zawng aiin mark in hmu sang ber a ni tih lo hre thar leh teh u. Nangmahnia kan duh lai tak hi, in sneaker leh bike te hi a ni lo. Mizo in nihna lai tak hi kan duhna lai tak chu a ni. Khawngaih takin hei hi dal suh se.

            Thlir dan thar:
            Billy Graham a ni emaw, Benny Hinn a ni emaw, hnam dang a nih vang ni lovin, anmahnia thawktu thlarau avang zawkin ka ngaisang tawh ang a. Ka piangthar a nih pawhin, ka thu dawnna changkang leh changkan loh lam buaipui lovin, ka thu dawn zawk chu ka nunpui tawh ang. Ka theih chin chinah min hringtu nu kutchhuak ka ngaisangin ka chawisang ang a, thil lei leh hralh thuah pawh ka chipuiten an hlawkpui theih dan ber ka ngaihtuah bawk ang.

            Mahse:
            Mizove tih vanga mawngtam lang puanvena puan venga Zawlbuk bawhbela bawk reng tur kan ni lo. TV te kan en ang, hnam dang lemchan te chhuahin kan en ang. An lehkhabu leh an nunphung tamtak hriat kan tum ang a, chung thil hriatah chuan tun aia let tamtaka hausak pawh ka tum ang. Finna hi hriatna tel lo chuan a awm thei lo. Dik leh dik lo khaikhin thiam tur chuan hriat tur tul hriat tam a ngai. Mi tihdan tha tamtak hriain hnam nuna seng luh ka tum ang a, mi tihdan a nih avang ringawtin, anmahni ngaisang mah ila, ka hnam nun tipawnlanga tidal thei tur thil a nih chuan ka hnualsuat ngam thung ang. Thatna kawngah mi ka entawh ang a, mahse, mahni nihna hloha anmahni an leh nih ve kher kan tum tawh lovang.

            Tichuan, kan tang ang a, kan thangharh bawk ang. Kan ding ang a, kan nghet bawk ang. Kan kal ang a, kan petek lo vang. A ziaktu nun derthawng leh derdep tak pawh sawi nghing thei hian, he thuziak phawsawlh leh tlawm tak hmang hian i thinlung rawn sawi nghing mial sela - naktuka thleng tura vanvadaka kan nghah chhawrpial run hi vawiinah, tunah, he thu i chhiar zawh rual hian han dawng ve hlauh teh la - lei hi pialral a chang tur.