India Independence Day vawi 73-na chu ram chhung hmun dang rualin vawiin khan Kamalanagar playground-ah pawh lawm a ni a. Chakma Autonomous District Council (CADC)-a Chief Executive Member (CEM) Pu Rasik Mohan Chakma chu Khuallian a ni.

Independence Day lawmna inkhawmah hian Khuallian chuan hnam puanzar pawt pharhin, parade contingent 12 te'n hnam puanzar chibai an buk chu a lo chhang let a. Hemi hnu hian thu a sawi nghal a ni.

Khuallian Pu Rasik Mohan Chakma chuan a kaihhruai CADC sawrkar hnuaia hma sawnna hrang hrang tar langin, zirna chaei kang tura an hma laknaah zirna in thawm that nan Rs nuai 20, sikul bungraw mamawh lei nan Rs nuai 10, green/white board lei nan Rs nuai 10 leh zirlai hnena a thlawna lehkhabu sem nan Rs nuai 20 dah a nih thu a sawi a. BADP hnuaiah sikul building pahnih sak zawh tawh niin, BADP hnuaiah vek building dang pali leh MSDP hnuaiah building paruk sak tum a nih thu a sawi bawk. Mi retheite dawm kan nan CADC chuan Rural Housing scheme hnuaia beneficiary 100 hnenah Rs vaibelchhe 1 leh ar vulh, vawk vulh leh leilet siamtu beneficiary 127 hnenah Rs nuai 19.05 an pek thu a sawi a. Parva-Siminasora, Parva-Kamtuli, Boroituli-Jaruldubosora, Ngharum-Rajmandol, Parva-Zochachhuah leh Chawngte-Nalbonya inkal pawhna kawngpui siam mek a nih thu sawiin, Kamalanagar-Ajasora kawng chu PCC-a siam that mek niin, Chawngte-Borapansury leh Borapansury-Tlabung kawng pawh kum tawp lama siam tan hman beisei a ni, a ti a. CADC huam chhunga khaw tin chu fur lai pawha ping bik awm lo tura siam an tum thu a sawi.

Kamalanagar-a Independence Day lawmnaah hian CADC-a member-te, state leh CADC official-te, zirlai naupang, tlawmngai pawl, political party lam leh mipui eng emaw zat an kal khawm a. March past-ah Duloram Public School chu pakhatna an ni.