Aizawl District  chhunga Village Council  te tana buatsaih ni hnih awh tur  Account Training  Programme for Village Councils under Aizawl District regarding  13th Finance Commission Grants, Chanmari  YMA Hall ah  vawiin khan neih a ni. LAD Minister Pu PC Lalthanliana chuan  he programme hi hmanpuiin  training  hi a hawng nghal  a. Kan ram khawtlang hmasawnna tur hian sorkar kut nghak kher lovin, enge  thil tha ka tih ve theih  ang tih thupuia neih a hun tawh a ni  a ti.

Kan ram khawtin leh veng tina  rorelna hian kan ram hmelhmang a ti lang a, mahni hrehawm pawisa lova khawtlang tana thahnemngai taka thawktu V/C tha tak tak an awm laiin  mahni inhaivur tum tlat V/C kan ngah chuan kan ram hmel lan dan a  mawi thei dawn lo a ni tiin  Account Training Programme  a kal V/C te hnenah khuallian Pu PC Lalthanliana chuan fuihna thu a sawi a. Khawtlang enkawltu leh roreltu a tana thlanchhuah  mawhphurtu an nih avangin  V/C te chu an bial, an area tung nung tur leh siamthaa ti hmasawn tu tur an nih avangin an finna, ngaihtuahna leh thiamna  hmang chhuak thiam tura chah in Sorkar emaw Bialtu MLA te emawa in nghat leh pur nghal zel  mai lovin an tih ve theih chinah chuan a chhe lai siamthatu ni ngei  tur in a sawm a. Khaw kar kawng chhia leh tihfai  leh hnatlang koh ah te, khawchhung tuitlan hnianghnar leh thianghlimna ah te  V/C te chu sorkar kutke an nih  inhria a tanlak a ngai  thu sawiin  kan ram, kan sorkar hian enge min tihsak ang tih aia kan khawtlang leh kan ram, kan sorkar tan hian enge  thil tha ka tihsak anga, enge ka lo tih ve tur tih chu  hmachhuan zawk tur a ni  tiin  LAD Minister chuan khawtlang hruaitu kan nih chuan  engtin nge Sorkar kan puih ang tih rilru put a ngai a, sorkar thatna leh hmasawnna turah hnathawh  leh contribution  kan neih that phawt chuan  Sorkar neitu, ram rorelna neitu  kan nih  kan inhre chiang  dawn a ni, a ti.

Rajiv Gandhi Panchayat Sashaktikaran Abhyan ( RGPSA) hnuaia  V/C insak leh thawmthat, Special support to Panchayats, Capacity building and training leh State Panchayat Resource Centre sak hna thawh chungchang te  sawiin Minister chuan sum lo kal dan azira  Model Village a thlan te thuamthar dan tur leh  V/C hnathawk tha te tana Computer Set  leh hnathawhna atana  tangkai tur hmanrua a V/C te chu thuam zel tum an nih thu a sawi bawk.

Pu K. Lalrohlua, DLAO Aizawl chuan training programme hi a kaihruai a, Pu R. Lalchhuanawma, Auditor Accounts & Treasuries Department leh  Pu RC Lalzarzova, JE, LAD ten technical training etc. ah zirtirna an pe a, LAD Officer ten thu an sawi bawk a ni.