Vawiin  khan Chief Minister Pu Lal Thanhawla chuan 10^th General Conference of Mizoram Government Ad Hoc Aided High School Teachers’ Association(MIGAHTA) Chanmari YMA Hall-a neih ah Mizoram hmalam leh a tun dinhmun thlirin Zirlaite rilru chher danglam a tul tih a sawi a. He hna pawimawh tak hi zirtirtu ten an hriatchian a ngai a ti. 

MIGAHTA members, High School  Zirtirtu te fuihna thu a sawinaah Chief Minister Pu Lal Thanhawla chuan pawl hniamber atanga pawlsang ber zitirtu te chu ‘File Nung’ khawihtu te an ni a, an nitin file  chu zirlaite mipuitlinga chher tura zirtir a ni a. Zirtirtute chu Text book chhunga mi chauh ni lo pawnlam thiamna leh inpekna atanga zirtirna pe thei an nih a ngai a. Aia upa zah leh Nu leh pa thuawih chu ram hruaitu leh mi hlawhtling nihna a ni tih te an zirlaite rilruah an tuh nghet tur a ni a ti. Hrilselna pawimawh zia, ruihtheih thil leh vaihlo kaihhnawih khawih in hrisellohna a thlen chungchangte zirlai te kawhhmuh tur chuan zirtirtu ten ‘role model’ nih an tum a ngaia, entawntlaka khawsa in chhunglam leh pawnlam nun an uluk zual bik a ngai a ni a ti.

Zirtirtute chu mipawimawh, hna pawimawh bik  thawk annih angin Mizoram dinhmun leh sawrkar hmalakna bakah  Mizoram hmalam chinchang te hriat tum tura chah in an hriat ngei pawh thil tul a ni a ti a. Chief Minister chuan duhamna avangin Aizawl khawpui chhung a tawt a, mi duhamte lirthei hun avangin vantlang kawngpui a chep a pawi tak zet a. Compensentaion leh kutlingloa sum hmuh tumna avangin sawrkar hmalakna lian tak tak a kal hlei thei lova; hmalakna kalchak theilo  zinga mi, Relkawng phah mek pawh compensation diklo taka phuttute avangin kum 2018 a zawh inbeisei, Railway thuneitute chuan Kum 2022-ah pawh an zo hman dawn em tih an sawi ngam tawh lo a , a pawi tak zet a ni a ti. “ Hetih lai hian Mizoram in hmalam hun eng tak a nei mek a, ramri sumdawnna kawng a inhawng mek a. Myanmar leh Bangladesh te nen indawrtawnna liantham zawk nei turin hma nasa takin kan la chho mek a. Independent hma in chhimlam chu sumdawnna kawtchhuah a lo ni thin a; Independent hnuah hmarlamah kawtchhuah kan nei tawh tak na a liantham zawka sumdawnna nei tur leh gateway for  trade and commerce with South and South East Asian Countries  ni turin chhimlam kan hawi leh tan tawh a, hmalakna thui taka kalpui a  ni tawh”, a ti.  “Chuvangin zirtirtute chu naktuk lawka kum lo tling tur in zirlaite leh chhuan thar zawk in la zirtir leh turte chu vantlang tana mi hnawksak te ngaihsang lo tur  te, duhamna sual laka fihlim tur te leh khawtlang nun chhe mek nia lang tungding leh tura fuih tur leh thudik hriattir thin turin ka chah  che u a ni”, a ti.

“Zirlaite mindset in thlak sak a hun in ka hria, Mizoram hmalam hun thlira an lo inbuatsaih dan kawng in kawh hmuh  a ngai a, sawrkar hna in a daih dawn lova, a daih ngai lo bawk nen – chuvangin mahni a intun nun, ‘self employment’ kan thalai ten an tui a ngai. Mahni a bultan tum te tan NEDP hnuaia Entrepreneurship Development Schemes  atangin entrepreneur nih tum te chu thawhpui leh sum ang zawng pawha tanpui an ni a.  Sawrkhar hmalakna lian zelah entrepreneur te hi kan innghahna an ni dawn a ni. 

Kan chhevel hnamdang te kan huphurh a,  intihzahawm leh intihchak kan duh chuan kan tan a ngai a. Tunhnaiah IAS a tling kan tlem tawh hle a, IPS phei chu kum 1995 atang khan kan la NIL a, central service danga inziak tling, sipai officer a lut leh sipai a tang kan tlem tawlh tawlh a. Nakin lawkah chuan kan duhthusam leh kan lawm em em ni lemlo ten sawrkar hna pawimawh an la chelh fur a hlauhawm hle a ni”, a ti. 

Khawvel hmasawn mek zelah midangte umpha tur leh el phak tur chuan science leh mathematics a pawimawh zual bik a, hnamdang tawng thiam, hnamdang nunphung hriat leh khawvel tukverh hawn zau a pawimawh a ti a. Chawei dawhkan kil dan mawihnai zawk, incheidan dik hriat chungchangte pawh zirlaibuah awm lo mahse zirtirtu ten kan zirlaite kawhhmuh an taihmak a ngai tak zet a ni a ti. Zirtirtu leh sawrkar hnathawk  dang zawng zawng te pawh ram siam that nan mawhphurhna anga pek vek an nih thu a sawi a. Ram hmasawnna atan rim taka thawk tura beisei an nih angin sawrkhar chuan an hamthatna tur pawh a dap reng a. Hlawh chungchangah pawh harsa lutuk lova an awm theih nan sawrkarin ngaihtuahna a seng mek a, Chief Secretary hova Sub-committee thukhawm pawhin ngawrh takin hna an thawk mek a ni a ti. 

Thusawitu dang,  School Education Minister Pu H.Rohluna chuan state dang te el phak tura zirna kawnga hmalakna hrang hrang te, zirtirtu hamthatna tura ruahmanna leh hmachhawp te a tarlang a. Zirlaite hmasawnna leh chher hna chu zirtirtu te kuta nghah pum hlum vek chi a nih loh thu leh nu leh pa te thlawpna te leh thawhpuina a pawimawh thu a sawi a. School Education Minister  chuan zirlaite tha taka kaihhruai anih theih nan zirtirtu leh zirlai nu leh pa te chu thla khatah vawi khat tal, a tlem berah inhmuh a tul ni in a sawi a. Exam result tha ringawt um a, Bazar note hmanga zirlaite chawm thanlen chu thil pawi tak a nih thu sawiin thiamna dik tak, quality education chu zirlai te mipuitling a siamna a ni tih zirtirtu ten an chian a ngai a ti. Sawrkhar in zirlai tam tak  kumtluana class kal  si, Board exam dawna selection examination hmanga chhawk leh thin chu tha a ti lova, khapna a siam a chu chu khauh taka kalpui a nih thu leh zirlai titha lo te pass tura theihtawp chhuahpui leh zirtir chu a dah ropui hle a ni a ti. Zitirtute tana remchanna turin Aizawl DIET leh Lunglei DIET-ah te nakum khian BEd zirna hawn a nih tur thu a sawi a. Zirtirtute leh sawrkar hnathawk te theih tawp chhuah tura beisei an nih angin sawrkar chuan sum indaihlohna nasa tak karah pawh an hamthatna a dap hram hram zel a. Chutih laia nawrh huaihawta thilphut tih hlawhtlin tum te erawh sawrkar chuan a ngaihsak thei dawn lo a, nawrh huaihawta  thil phut tawhtute pawh sawrkar in an ngenna te a la ti hlawhsak thei lo  a ni a ti. 

MIGAHTA Conference-ah hian ISTH Mizoram Chapter President Pi Lal Riliani pawhin thusawina hun hmangin  ruihlo thatlohna leh vaihlo leh a kaihhnawih khawih vanga hrisellohna tam taka wm thei chungchang te zirtirna kawngah ziritirtute chu campaigner ni vek turin a sawm a. Zirtirna pe turin mahni thianghlim hmasak a ngaih thu a sawi a. Vaihlo leh a kaihnawih chu thiantha anga lang thihna thlentu, bumhmang, mi puitling zawk te pawn an hriat fuh theih loh a  ni a. Nasa taka do leh a thatlohna tlangau pui chu mi dangte thatna tur ngaihtuah duhtu te tana mawhphurhna a ni a ti. 

10^th General Conference of MIGAHTA hihun thum ah then a ni a, hun hmasaberah an pawl kaihnawih thil ngaihthlakna leh an member fam ta te sunna hun hman a ni a. Hun then thumna ah an pawl hruaitu thar inthlanna neiin MJA-ten an kaihruai a. Hun thenhnihna Chief Minister Pu Lal Thanhawla ho a hman hi MIGAHTA Vice President Pu David L.C. Chhakchhuak in a kaihruai a, he hunah hian MIGAHTA President Pu Lalzirliana’n thusawina hun hmangin MIGAHTA lawmthusawina leh ngenna thuziak chu Chief Minister leh School Education Minister te hnenah a thehlut nghal a . He hunah hian Chief Minister Pu Lal Thanhawla chuan nakum session  atangin Sainik School Chhingchhip ah India ram a vawikhatna ni turin hmeichhe naupang tan admission hawn tum a nih thu a sawi a ni.