4243/2024-2025

Siaha the 14th February 2025: Tukin zing dar 7:30 khan District Level Fire Prevention Committee, Siaha buatsaihin Kangmei ven hapta 2025 hawnna hun Forest Conference Hall, MADC ah hman a ni a,  Pu VL. Hruaizela Khiangte, Chairman, District Level Fire Prevention Committee leh Deputy Commissioner, Siaha ni bawk chuan khuallian niin hun a hmanpui.

Khuallian Pu VL Hruaizela Khiangte chuan ‘Ramkangin mihring leh nungchate a nghawng nasatzia leh boruak a tihchhiat zia hretu kan ni a, ramkang tur ven chu mi tin mawhphurhna a ni’ tiin mawhphurhna hlentu ni theuh turin kalkhawmte a sawm. Khuallian chuan thiante leh chhungte pawh kangmei tichhuak lo tur leh kangmei chhuak a awm thulah pawh thelhmih thuai a nih theih nan hmalatu ni tura sawmtu ni turin kalkhawmte a chah bawk. 

Pu VL Hruaizela Khiangte chuan boruak tha tibawlhhlawh lo tura theihtawp chhuahho a ngaih thu sawiin, ‘tha kan thawhna zawng zawng chu midang tan nilovin keimahni leh chhuan lo la awm lehzel tur tan a ni a, keimahni lo chu kan district tana che chhuak tur chuang an awm lo’ tih hriain tlawmngai pawl leh VC te nen sawrkar department pawh lungrual taka thawkho a tul a ti a ni. 

Pu Jimmy N. Ramdina, Deputy Conservator of Forest, MADC-in report pein nikum 2024-a Siaha District chhunga ramkang chhinchhiah zat chu 222.65 Hectares a ni. Kangmei chhuak tur laka invenna Awareness campaign nei thin chu khaw tinah kalpui mek zel a ni a, kumin kangmei ven hapta thupui chu “Kangmei venhim hi kan tu leh fate hmakhua a ni” tih a ni. 

Pu Solomon N. Beihlotha, Assistant Secretary, MTP General Headquarters chuan MTP chu chhiatni thatniah che chhuak tura inring renga an awm thu sawiin engtik hunah pawh kangmei a chhuah chuan thelh tur leh che chhuak turin branch tinte pawh an inbuatsaih thu a sawi rualin kangmei tichhuak tur laka fimkhur thar theuh tur leh kangmei chhuak awm apiang timittu ni theuh turin kalkhawm te a chah bawk a ni.

Kangmei ven hapta 2025 hawnna hun hi Pu Abraham Beirazi Khithie, Additional DC chuan kaihruaiin sawrkar official bakah Join Village Council, NGOs, MJA leh Environmental of Forest and Climate Change, MADC-a thawktute an tel a ni.