3323/2022-2023

Champhai, the 23rd January, 2023: Vawiin chawhma dar 11 khan Champhai District Fire Prevention Committee chu Chairman Pu James Lalrinchhana, District Bawrhsap hovin I&PR Conference Hall, CHANEM-ah an thukhawm a, February ni 6-10, 2023 chhunga Champhai District-a ‘Kangmei Ven Hapta’ hman dan tur leh kumin thal chhova Champhai District chhunga kangmei a chhuah lohna tura hmalak dan tur hrang hrangte an rel.

District Bawrhsap Pu James Lalrinchhana chuan Champhai District-a chhiatna thleng thin zingah lirnghing leh kangmei chhuak avanga chhiatna a thlen tam ber thu sawiin, engemawchena ven lawk theih kangmei laka him tlan nana hmalak a tul thu a sawi a. Kangmei leh chhiatna dang thleng thei laka him tlan nan inzirtirna tha neih a pawimawh thu sawiin, Chanchinbumite leh NGO te hmalakna chu fakawm tiin thawhhona duhawm tak chhawmnung zel turin a chah a. Ram kang mai piah lamah khawchhung, in leh hmunhma kang mai theite ven chu ngaihpawimawh tel a tul thu a sawi a. Kangmei ven kawngah tha kan thlah thiang lova, hmasawn zawnga kal turin theihtawp kan chhuah a ngai a ni, a ti bawk.

Pu Lalduhthlana, DFO, Champhai Forest Division & Member Secretary, Champhai District Level Fire Prevention Committee chuan kum hmasa lama kangmei ven hapta chhunga hmalaknate a tarlan bakah kumin atana hmachhawp awmte a sawifiah a. Kum 2022 ah Champhai District chuan kangmei veng kawnga District thawk tha pahnihna lawmman State Level Committee on Fire Prevention atanga a dawn thu a sawi a. Champhai District chu India rama ram kang thlen tam zualna State 11 hnuaia District 26 zingah a tel thu sawiin, kangmei ven kawnga hmalakna project cheng vaibelchhe 19 hu, kum 2022-23 atanga 2026-27 (kum 5) chhunga kalpui tur, Sawrkar laipui Ministry of Environment, Forest & Climate Change (MoEF&CC) leh National Disaster Management Authority (NDMA) pawmpui tura thawn anih thu a tarlang bawk.

He hunah hian nikum lama hmalaknate thlirho niin, January ni 10, 2023 a State Level Sub-Commitee on Fire Prevention rorel thuchhuakte ngaihthlak a ni a. Champhai District Fire Prevention Committee thukhawm chuan Kangmei Ven Hapta hawnna chu February ni 6, 2023 (Thawhtanni) hian Govt. Champhai College Multipurpose Hall-ah District Bawrhsap hova neih nise, he hunah hian kangmei laka fimkhur tura inzirtirna buatsaih nise tiin an rel a; hun hman dan tur kimchang chu Nodal Department Environment, Forest & Climate Change (EF&CC) kutah dah a ni.

Kangmei laka fimkhur tura inzirtirna, kangmei ven tangkaina leh kang thelh kawnga hriat tur pawimawhte leh tulte a zau thei ang bera mipuite thlengpha ngei tura puanchhuah dan turte sawiho a ni a. Media hrang hrang, poster, VC leh YMA te nena thawk hovin inzirtirnate kalpui tha tih a ni a. Zirna in leh Sawrkar Pisa-a thutiam chhiarchhuah tur siam nise, Block Level leh Village Level-ahte BDO hovin VC leh NGO te'n inzirtirna kalpui se tih a ni bawk a. Kangmei ven kawnga dan leh hraite sawihona hun Police leh EF&CC Department-te tangkawpin buatsaih se tih a ni bawk.

Kangmei hluar hun chhungin ran vulh mi, sapel thinte leh silai kawlte hnenah kangmei ven leh nungcha humhalh kawnga inzirtirna neih tha tih niin, Airgun leh Ulhbun inkahsiak huaihawt tha tih a ni a. Zirlaite tan kangmei ven hapta kaihhnawih Essay inziahsiak buatsaih nise tih a ni a, kangmei ven kawnga thawk tha khua/veng pathumte hnenah lawmman pek nise tih a ni a; pakhatna Rs 50,000/- leh Certificate, pahnihna Rs 30,000/- leh Certificate leh pathumna Rs 20,000/- leh Certificate-te pek nise tih a ni a. Kangmei ven kawnga inzirtirna hla inphuahsiak buatsaih nise tih niin, pakhatna Rs 10,000/-, pahnihna Rs 7,000/- leh pathumna Rs 5,000/- pek nise tih a ni a. Heng bakah hian kangmei ven kawnga inzirtirna chungchanga nitin chhuak chanchinbu thawhhlawkte tan lawmman siam tha tih a ni bawk a, a thlangtu turte ruatfel nghal a ni bawk.

Nodal Department Environment Forest and Climate Change-in mipuite hnenah hriattur pawimawh leh tangkaite duang chhuakin a zau thei ang bera kangmei hluar hun laiin mipuite zirtirna lam hawia thuchhuah siam leh zirlai naupangte hnena kangmei ven kawnga zirtirna pek nise tih a ni a. Huan, Leipui leh Lo hal tur te’n Sawrkarin dan a siam zulzuiin mei kawng sial theuh se, kawngpui vat chhuak lo tur leh Lo hal hun March ni 13, 2023 aia tlai lova hal hman vek tura hriattir nise tih a ni bawk.

Champhai District-ah kum 2022 chhung khan ram kang tum 210 a thleng a, hemi avang hian ram hectare 3243.08 a kang nia chhut a ni. Heng zinga tum 209 (hectare 3205) chu Lo/Leipui/Huan kang vang niin, Forest Area kang tum 1 (hectare 38.08) a thleng bawk. Ram tikangtu tam zawkte mumal taka hriatchian theih an nih loh thin avangin nikum chhungin ram tikangtu pakhat lakah FIR thehluh a ni a. Nikum chhung vek khan lo hal hun bituk chhunga rokhawlhna avanga hal hman lo khaw 3 te'n thuneitute hnenah phalna lain an hal a ni.

Kum hnih dan zela tihchhuah thin India State of Forest Report (ISFR) 2021 tarlan danin Mizoram pum zau zawng atanga chhuta za zela 0.74 chu ngaw dur chhah tha (very dense forest) a ni a, ngaw dur chhah tha lutuk lo (moderately dense forest) za zela 26.11 a awm a, ram hring chin kan tih forest cover zau zawng chu za zela 84.53 a ni. Undivided Champhai District-ah ngaw dur chhah tha Sq. Km 55.36, ngaw dur chhah tha lutuk lo Sq. Km 942.9 leh ram hring pangngai Open Forest Sq. Km 1375.63 a zau awm anga chhut a ni. Undivided Champhai District bika ram hring zau zawng forest cover area chin chu ram zau zawng atanga chhuta za zela 74.53 a ni. Kum hnih kalta 2019-2021 chhunga Mizoram puma ram hring (Forest Cover) kan hloh zat chu Sq. km 185.51a ni a; heng zinga Sq. Km 113.90 a zau chu Undivided Chanmphai District chhunga thleng a ni.