2246/2025-2026

Aizawl 17^th November 2025: Vawiin chawhma dar 11:00 khan Mushroom Centre, Mizoram Science, Technology & Innovation Council (MISTIC), Directorate of Science & Technology, Planning & Programme Implementation Department, Govt. of Mizoram buatsaihin Innovation Facility Centre Auditorium, MINECO, Aizawl-ah “One Week Capacity Building Progremme on Mushroom Production & Marketing Strategies” hawnna hman a ni.

He hun hi Pu Samuel Lalmalsawma, Principal Scientific Officer, MISTIC in kaihruaiin, Er. H. Lalsawmliana, Member Secretary, MISTIC chu khuallian a ni a, Khuallian hian training-a tel zawng zawngte hnenah duhsakna hlânin, thahnem ngai taka zir tur leh pa khawi hlawhtling zui thei ngei turin fuihna thu sawi a. Dr. Lalchhandami Tochhawng, Training Coordinator chuan training neih dân tûrte leh eizawnna atâna sâwt pui theih dan tur te kalkhawmte hi a hrilh bawk.

Chawhnu lamah Technical session neih zui nghal a ni a, pa khawi lama mithiam ten an zirtir zui a ni. Dr. Albana L. Chawngthu, Mushroom Expert chuan ‘The Science of Mushroom and its Cultivation’ chungchang a sawi a; Pu Lalzarzova, Mima Farm chuan pa khawi a sumdawnna a buaipui dan leh a tawnhriat te a sawi bawk. Pi Vanlalhlimpuii Pachuau, Project Associate-II, MISTIC chuan thianghlimna lam ‘Quality, Safety and Innovation in Mushroom Processing and Value Addition’ a sawi a. Pu Joel Lalbiakkima, Scientific Officer, MISTIC-in ‘Marketing Opportunities and Strategic Business Planning’ thupui a sawi zui bawk a ni.

He programme hi kâr khat chhûng awh tûr niin, pa khawi dân te, a khawina atana thil tul pawimawhte, pa chi hrang hrang khawina hmun buatsaih dân te leh sumdawnna lama hriat tur pawimawh te an zir zui dawn a ni.