Nimin (17.12.2015) khan Minister Pu H. Rohluna chuan a bial Lengteng Constituency chhunga Model Village atan a thlan Kawlbem-ah Community Hall hawngin, Model Village lawmna hun leh khawtlang mipuite nena hmalak dan tur sawihona a hmanpui. He hun hi Champhai DC Pu Vanlalngaihsaka chuan kaihruaiin, Model Village atan hmalakna hrang hranga mawhphurtu Department atangin District Office-a hotute an tel a ni.

Minister Pu H. Rohluna chuan Kawlbem chu midang tan khaw entawntlak ni turin buatsaih a nih thu leh, model village-a cheng an nihna hi a takin khaw mipuite ah lo lang se a tih thu a tarlang a. Sorkar hmalakna mipuiin an tawiawm a pawimawh thu sawiin Minister chuan Sorkar tih tur ringawta dah vek chuan an chang thelh thei a ni a ti a. Hmasawnna chu beisei tur a nih rualin a thlenna tur mipui te rilru hi buatsaih fel a nih hma chuan a hlawhtling thei dawnloh thu a sawi a. Chei tlak leh duhsak tlak ni tur chuan khawtlang mipui te pawhin thahnemngai takin tih tur kan nei a ni tih hre reng chunga Sorkar nen tha kan inbat tawn tih hriain hmalak a pawimawh a ni, a ti.

Minister chuan faina kawngah te pawh hmasawn tur chuan midang bul tan turin a beisei theih lo a, mahni theuhvah bultan tum vek zawk tur a ni, a ti a. Khaw changkang leh changkanglo tehna pakhat chu bawlhhlawh sawngbawl dan te a nih thu a tarlang a. Thing phun uar tura hmalak tumna te chu pawimawh a tih thu sawiin, Kawlbem chu Model Village a nih angin ram tikanglo tura beihnaah pawh tang zual se a tih thu Minister chuan a sawi a ni. Community Hall hawn thar pawh chu hmang tangkai thiam turin a chah a, dim tak leh neitu rilru pu chunga vawng turin a chah a ni.

Hun kaihruaitu Champhai DC Pu Vanlalngaihsaka chuan Kawlbem khawtlang hruaitute mai bakah mipuite chuan khaw dangte tan entawntlak ni tura theihtawp chhuah tura a beisei thu sawiin, vawiin hun chu an tan vek a ni tih hre reng chungin hmang tangkai turin kalkhawmte chu a sawm a. Hri danna pek chungchangah te pawh a thawktu an indaihloh avangin khaw mipuite pawhin a la dawnglo an awm chuan tangrual taka thawktute pawh bengvar thin turin a chah a ni. He hunah hian Pu CC Lalchuangkima, Champhai DRDA Project Director leh Pu Malsawmzuala, Ngopa BDO ten thu an sawi bawk a ni.

Bialtu MLA in Kawlbem chu khua entawntlak a nih theih nana hmasawnna tur kawng a thlan ho chu:

100% ziak leh chhiar thiam; naupang school kal rual chu school luh vek; naupang hri danna pek kim vek; khawtlanga faina leh thianghlimna kalpui; Chhungkaw tin in inthiarna mumal tak an neih vek; thi leh piang zat mumal leh kim taka chhinchhiah sak vek.

Heng bakah hian SAGY Committee chuan Kawlbem hmasawnna atan ruahmanna a siam angin heng: - khaw chhung leh khaw pawn kalpawhna kawng tha te; banking leh financial literacy lama hmasawnna te; tui thianghlim te; polythene bag hman khap te; innei zawng zawng mumal taka chhinchhiah te; irrigation system tha zawk siam te; ran vulh zawng zawng hri danna pek te leh kawng kama thing phun uar kawngah te hmalak tan a ni tawh bawk.

Tunah hian Kawlbem ah ziak leh chhiar thiamlo mi 38 an la awm a, 2014-15 endikna atang a lan dan chuan school kallo an awm hrihlo a, survey thar nei tura hmalak mek a ni bawk. Naupang zingah 5% hri danna pekloh an awm a, ui leh ran vulh zawng zawng pawh hri danna chiu anih tawh thu tarlan a ni.

Vawiina Kawlbem Community Hall hawn hi 60x36 feet bial a zau leh 24 feet a sang niin, cheng nuai 25 seng a BADP hnuaia sak a ni a. Green Room leh pawn rawng hnawih hna kalpui mek a ni bawk. Model Village chungchang sawikhawmna ah hian Champhai District atangin SE (PHED), DPC (SSA), Deputy DPC(RMSA), ACF leh DIPRO te an tel a ni.