Kawnpui – Hortoki kawng North East Frontier Railways ten Bairabi – Sairang rel kawng an sial mekin a tihchhiat avang a khawtlang mipui ten road block neih an tum chungchangah vawiin khan Joint Meeting Pu H.Lalengmawia, District Bawrhsap hovin a pisaah neih a ni.
Kawnpui-Hortoki kawng hi rel kawng laih mekin zawh hleihtheih loha a siam avangin, khawtlang mipui an lungawilova, hemi chungchangah hian DC hovin meeting tum li neih tawh a ni a. District Bawrhsap chuan 28th August, 2016 a meeting thutlukna Rel kawng sialtu ten an ngaipawimawh lo chu pawi a tih thu a sawi a, rel kawng laitu te chu khawtlang mipui tawrhna hriatthiam pui a kawng siamthat hna thawk thuai turin a ngen a ni. Kawng sialtu NF Railways leh Contractor te chuan kawng chu vawiin tlai atanga siamtha tura intiamin, inremna ziah a ni a. Kawnpui – Hortoki kawng hi Sumo leh sumdawng motor dang ten an zawh theih nana siamtha tura inremna siam niin, kawng siamthat hnathawh hi Joint VC Kawnpui leh Joint Action Committee (JAC) Hortoki ten Sr.EE, PWD Kolasib leh SDO(C) kaihhruaina hnuaiah an endik thin dawn a ni. Inremna ziah a nih tak avang hian District Bawrhsap chuan Hortoki mipui te chu kawngdan an tum thulh rihturin a ngen a ni.
Meeting-ah hian Executive Engineer,North East Frontier Railways , Sr. Executive Engineer PWD, Kawnpui Joint VC, JAC Hortoki leh Hortoki kawng zawhtu Company hrang hrang te an tel a ni.
