3984/2023-2024

2024 Ramtuk thla ni 27: Vawiin khan Army Recruiting Office (ARO), Aizawl chuan Kolasib District-a Kawnpui khuaah sipaia ṭang duh ṭhalaite tana hriat tur pawimawh leh ṭangkai inzirtirna hun an buatsaih.

Awithangpa Hall, Kawnpuia sipaia ṭang duh ṭhalaite tana inzirtirna hun buatsaih hi Col. Sarvanan, Director, ARO Aizawl chuan Agniveer sipai lak runpui lo awm leh tur atan February ni 13 aṭanga March ni 22, 2024 thleng www.joinindianarmy.com -ah registration tih theih a nih thu leh Written Exam chu April ni 22, 2024 aṭanga neih ṭan tur a nih thu sawiin, ṭhalai a tam thei ang ber sipaia luh tum turin a chah a. Sipaia ṭang duh ṭhalaite tana hriat tur pawimawh hrang hrang sawiin, ṭhalaite'n an hriat duh ang te a hrilhfiah nghal a ni.

He hun hi Army Recruiting Office, Aizawl leh Kawnpui Joint Village Council te huaihawt niin, sipai ṭan tum ṭhalai 72 zet an kal a. Army Recruiting Office-a thawktute chuan registration tih dan tur an hrilhfiah bakah, a hmunah an tihsak nghal bawk a ni.