1264/2024-2025

Dated Hnahthial, the 23rd July 2024: Tukin zing khan Hnahthial District Volleyball Court-ah Public Health Engineering Department (PHED) Hnahthial WATSAN Division bultumin Kawthalo Tihtawp beihpui thlakna (Stop Diarrhoea Campaign) Hnahthial District chhunga hman tan tur chu Pi Rita Lalnunmawii Pachuau, Hnahthial District Bawrhsap chuan a hawng.

Inkhawm hi Pu Darthangvunga, EE, PHED Hnahthial WATSAN Division chuan a kaihruai a, thu sawiin Pi Rita Lalnunmawii Pachuau District Bawrhsap chuan, sorkar hmalakna kawng hrang hrang avangin naupang khawthalo vei dinhmun a tlahniam tawh hle a, a lawmawm hle a ni. Kumina Kawthalo Tihtawp beihpui thlakna (Stop Diarrhoea Campaign) in a tum ber chu kawthalo avanga thihna pumpelh a ni a, hemi campaign tihhlawhtlinna atan hian mitin kan pawimawh a, naupang hrisel hian khawtlang hrisel a siam a, khawtlang hrisel chu khawtlang changkang leh hmasawnna kawnga hlawhtling an ni. Thianghlimna kawngah nasa taka hma kan lak a ngai a, kawthalo hi natna tlanglawn tak ni mahse awlsam taka ven theih a ni a, chumi atan chuan tui thianghlim chauh hman te, in leh a vel vawn fai te, mahni intihfai, kut silfai uluk te, faina kawnga theih tawp chhuaha inzirtir te hi a ni tih kan hriat reng a tul a ni tiin Hnahthial District chhunga Kawthalo tih tawp a nih theih nan Kawthalo Tihtawp beihpui thlakna (Stop Diarrhoea Campaign) chu a hawng a ni.

He hunah hian Pi LT. Rose Mary Hnamte, CDPO, Dr. Zosangliani, MD (Paediatrics), Medical Officer te pawhin kawthalo inkaidarh dan, inven dan chungchang a sawi a, Pu C. Lalmuankima, SDO PHED Hnahthial chuan lawmthu sawiin hun a khar a ni.