Damdawi In faina leh kawng hrang hranga hmasawnna tur atana programme pawimawh tak ‘Kayakalp’ chungchang sawihona leh lawmman chungchang training ‘Awareness Workshop on Kayakalp and Dissemination of Guideline 2017-2018’ leh ‘External Assessors Training - for TOT of Kayakalp Tools’ chu vawiin khan Aizawl Civil Hospital Conference Hall-ah neih a ni.
Kayakalp Awareness Workshop kaihruaitu Dr.Lalthantluanga Chawngthu, State Programme Manager, NHM chuan India rama Kayakalp kalpui dan chipchiar takin a sawi a. Kayakalp chu district tinte tana inelna a nih avangin thawktute theihtawp chhuah turin a chah bawk. Dr.R.Lalchhuanawma,State Nodal Officer, Quality Assurance, NHM chuan Mizorama Kayakalp kalpui dan chungchang a sawi a, kumin 2017 atangin Kayakalp hi Urban Primary Health Centre-ah kalpui tan a nih tur thu te a sawi. Dr.Lucy Chawisangzeli, State Consultant Quality Assurance chuan Award Criteria & Institutional Frameworks tih thupui hmangin zirtirna a pe a. Dr.Evelyn Lalremsangi Hmar, State Consultant Quality Asurance Process of Assessment & Award Declaration tih thupui hmangin zirtirna a pe bawk.
‘Kayakalp’ hi nikum 2015 atang khan Mizoramah kalpui tan niin a tirah chuan District Hospital chauh huam tir a ni a. Kumin 2017 khan a huam zauh a ni ta a; District Hospital, CHC, PHC zawng zawng a huam bakah Urban Primary Health Centre zawng zawng a huam tel tawh dawn a ni. Kayakalp hnuaiah hian Damdawi In fai, nuam leh thianghlim, bawlhhlawh sawngbawl dan te bakah hospital kalphung felfai kawngah tehfung siam a ni a, lawmman pawh tha tawk tak siam a ni ang.
Urban PHC bikah hian tehfung hrang hrang hmanga teha mark 70% hmu chinte tan Commendation Award cheng sing 5 dawn theih a ni ang a; District Hospital ti tha berin cheng nuai 3 a dawng bawk dawn a ni. Community Health Centre leh Sub District Hospital ti tha ber hian cheng nuai 15 dawngin a dawttuin Commendation Award atan cheng nuai 1 lakh a dawn bakah District zawng zawnga PHC ti tha berin cheng nuai 2 dawngin pahnihnain cheng sing 5 an dawng bawk ang.
Kayakalp lawmman hi kumin October ni 2, 2017 hian sem tura ruahman a ni a, tunah hian Kayakalp kalpuitu ten nasa takin tan an la chho mek zel a ni.
