Agriculture Technology Mission Agency (ATMA), Aizawl hmalaknain nimin khan Keifang Community Hall-ah District Level Agriculture Exhibition huaihawt a ni a. Exhibiton hawnna inkhawm hi Aizawl D.C. Pu C. Thanchhuma, IAS in a kaihruai a, Home Minister Pu R.Lalzirliana chu Khuallian a ni.

Khuallian chuan Pathianin thlai engpawh that theihna hmunah Mizote a dah a, chuvangin theihtawp chhuaha hnathawk hi kan bat a ni, a ti. Kuthnathawk leh lonei tuten harsatna hrang hrang karah hna an thawk a, sorkarin an thawhchhuah te pholan theihna tur exhibition an buatsaih sak theih chu a lawmawm hle a. Sorkar hmalakna pawimawh tak pakhat NLUP hlawhtlinna tak tak pawh kuthnathawktute leh a kaihhnawih department te taimakna leh thawhrimnaah a innghat tlat a ni, a ti. Mizoram chu kawlphetha lamah a intodelh theih nan sorkarin chak takin hma a la zel thu a sawi a. Sorkarin lohal hun a bituk hunchhung ngeia loneituten an lo hal turin a chah a, dan bawhchhiate chu hrem an nih tur thu leh ramkang laka inven nan hei hi a tul a ni, Home Minister chuan a ti bawk.

Keifang Agriculture Exhibition-ah hian lonei leh ranvulh mi 395 an tel a, thlai bakah thil chi hrang hrang 552 pholan a ni. Exhibition-a thlai tha ber ‘Queen of the Show’ ah mai kg. 32-a rit leh Coconut bawr lian ber rah 28 lai nei chu ‘King of the Show’ thlan an ni.