Tripura transit Camp-a Reang (Bru) Mizoram mi leh sa an nih loh enfiah hna kalpui zel niin vawiin khan Khakchangpara-ah enfiah hna hi kalpui leh a ni.

Reang ( Bru) te Mizoram mi leh sa an nih leh nih loh enfiah hna hi ni 2-5, Nov 2016 chhung khan Kaskau Camp ah neih niin Nov ni 5 inrinni khan zawh fel a ni a, Vawiin atangin Khakchangpara Camp ah enfiah hna hi kalpui leh tan a ni.

Tarlan tawh anginTripura-a Reang (Bru) Mizoram mi leh sa an nih leh nih loh enfiah nan hian 1995 Electoral Rolls chu hman a ni a, Reang (Bru) te hi Mizorama an rawn leta an awmna tur District hrang hrang atangin enfiah hna thawk tur hian dawhkan siam a ni. Kar hmasa lama Kaskau-a Mizoram mi enfiahnaah hian mipui an in lan thain, boruak muanawm tak hnuaiah neih a lo ni tawh a ni.

Vawiin-a Khakchangpara Camp atanga endik tura inlan hi Lunglei District atangin chhungkaw 4 atangin puitling 16 leh naupang 10 an ni a, Kolasib District tangin chhungkaw 14 ah puitling 54 leh Naupang 28 an ni.

Mamit District atanga enfiah tura inlan hi chhungkaw 163 atangin puitling 694 leh naupang 317 enfiah an ni.

Khakchangpara Camp-a enfiah hna kalpui hi vawiin tlai khan zawhfel nghal a ni.