Nimin leh vawiin hian Lawngtlai District a Theihai, Kawlchaw Theihai tia hriat lar (Rangkuai Theihai an tih bawk) chingtu, Kawlchaw West, Sihtlangpui, Chawntlangpui, Saikah leh R. Vanhnea khuaa chhungkaw hrang hrang 95 te hnenah Divisional Horticulture Office Lawngtlai chuan Theihai Nget ven dan zirtirna hun an nei.

Integrated Pest Management hnuaia buatsaih Theihai Nget ven dan zirna hi Lawngtlai DHO Pu L. Lalhmingmawia Pachuau in kaihruaiin zirtir hna hi amah leh Pi R. Lalmuanpuii, Horticulture Extension Officer ten an nei a, damdawi hmang kher lova ven dan te an huanah kala an hrilhfiah bakah tuna an Theihai sen tan mek enkawl zuina tur hmanrawn engemawzat an sem nghal bawk a ni.

Kawlchaw Theihai hi Theihai tui tak mai a ni nain a nget a awm thin avangin beisei angin hralh a tlak loh phah bakah a chingtuten an hlawk pui tawklo thin a. Chu harsatna sutkian dan chu ngaihtuahin tunah hian Horticulture Department chuan a theih ang tawkin hma a la mek a, hei hian rah tha zawk a chhuah pawh a rinawmin lonietuten an hlawkpui ngei a beisei awm hle a ni.