Tukin zing dar 10:00 khan Zofa zinga Thu leh Hlaa mi hmingthate chawimawi nan a Khawbung khua a din Hlakungpui Mual kum sawmhnih pangana (Silver Jubilee) lungphun chu Pu P.C. Zoramsangliana, Minister Arts & Culture chuan khuallian niin in a hawng.
Hawnna inkhawm Hlakungpui Mual a neih Dr.Vanlalrengpuia, Chairman Mizo Hlakungpui Mual Silver Jubilee Committee kaihhruai ah hian khuallian chuan thusawiin he hun ropui tak, thu leh hlaa kan kungpuite chawimawinaa hun pawimawh a chang hi a lawmin a phu lo hle a ni a ti. Sailo Lal Kairuma, lal fing leh fel takin a din khua Khawbung, a pian atanga lal fing tak kaihhruai khua hian thil thui tak thlirin Zoram rohlu in din hi kan ramin a tangkai puiin a ngaihsanawm a ni tiin, Mizo mizia nena inrem tak kan Pathian fakna hmanraw pawimawh tak phuahtute hi an hlu a, kan mizo rimawi te nen a inrem a, Pathian fakna tlak a ni a ti
Khawbung khua a mau mit muala mau danglam bik tak humhalh tura kalkhawmte chu sawmin Pu Zoramsangliana chuan khuanun a duan ang taka maumit muala mau te chu vawiin atang hian i humhalh ve ang u, leilung dam chhung zawng an dam ve a, Khawbung leh Mizoram hming chawi lar tu ni kumkhua turin tun atang hian hma i la ang u tiin Hlakungpui muala Silver Jubilee dar kan vuak rual hian chung maute tan chuan zalenna dar i vaw ve ang u tiin sawm a ni. Lungphun a hawn rual hian Khuallian hian 1986-2011 chhunga Hlakungpui Mual a sengluh tawhte thlalak leh chanchin phochhuahna Exhibition pawh a hawng nghal a ni
Jubilee lawmna ah hian Mizoram hmun hrang hrang atangin Jubilee lawm turin mi 800 chuang zet an kal khawm a, dar vaw tura thlan ten Jubilee dar an vaw bawk a ni.
Hawnna inkhawm ah hian Pu T.T.Zothansang MLA Champhai North leh Pi Lalthlamuani MHIP Hqrs.President te leh mi pawimawh tak tak an tel a ni.
Chawhnu lamah Seminar-cum-symposium neih a ni a, hetah hian Pu Lalrinmawia Ralte Parliamentary Secretary Home, RD etc chuan khuallian niin a hmanpui a. Naktuk hian Hlakungpui Muala sengluh thar turte lungphun hawnna neih leh tur a ni a, hetah hian Pu Lalrinliana Sailo Minister H& FW etc chu khuallian a ni ang.
