No.3889/2020-2021

Dated Champhai, the 7th August, 2020 (Friday): Thingtlang hmasawnna atana sawrkar laipui hmalakna peng pakhat National Rural Livelihood Mission (NRLM) hnuaia Mizoram State Rural Livelihood Mission (MzSRLM) kaltlangin vawiin khan Champhai District Khawbung RD Block huamchhunga Self Help Group (SHG) te hawh theih tur hmanrua leh khawl chi hrang hrang Custom Hiring Centre (CHC) khaw 5-a dah turin Pu Benjamin Zalawma Ralte, BDO Khawbung chuan a semchhuak.

He hun Khawbung BDO Pisa tuala neih hi Block Mission Manager Nl. Lalrindiki Royte chuan a kaihruai a. Pu Benjamin Zalawma Ralte chuan India rama cheng mipuite an intodelha thawhchhuah tam zawk an neih theihna atan sawrkar laipui ruahmannain pawl inhlawma thawhhona hlawk tak neih anih theihna atan Self Help Group din a nih thu a sawi a. Self Help Group-te hmalakna tanpui turin leh mahni kea dinga thawk chhuak turin an mamawh hmanrua leh sum leh pai puk theih dan tha tak takte sawrkarin a ruahman a ni, a ti. Vawiin nia an hmanrua leh khawl sem pawh member te'n hawh man tlem zawk leh hna sawt zawka an thawh theihna atan tangkai taka hman ni thei se a duh thu a sawi bawk.

Vawiin hian Mizoram State Rural Livelihood Mission (MzSRLM) hmalaknain Khawbung RD Block huam chhunga khaw panga- Khawbung, Khuangleng, Samthang, Farkawn leh Khuangthing Custom Hiring Centre (CHC) ah Self Help Group member te'n an eizawnna mila an hawh chhuah theih tur hmanrua leh khawl chi hrang hrang Power tiller 1, Combine Rice mill 2, Chainsaw 3, Sprayer 5 leh Grass cutter 5 te hlan an ni.