218/2022-2023

Champhai, the 21th April, 2022: India ram zalenna kum 75 na tlin hriatrengna leh lawmna pual Azadi Ka Amrit Mahotsav (AKAM) lawmna denchhenin vawiin khan Khawbung RD Block huamchhunga Khawbung PHC ah National Health Mission (NHM) bultumin 'Hriselna Kutpui' Block Level Health Mela buatsaih a ni.

He hunah hian District Hospital Champhai leh CMO Office Champhai atanga inenkawlna leh hmanraw neih ken theih tha ber berte thawhchhuahpui a ni a. Health Mela kaltlang hian District Hospital Champhai pan remchang lo leh harsatna neite tan remchanna siam sak mai bakah, health service hrang hrangte chhawp hnaih sak an ni a, mipuiten an hlut hle a ni.

Azadi Ka Amrit Mahotsav Block Level Health Mela, Khawbung PHC a neih kaltlang hian a thlawna inentir leh damdawi semchhuahna hun buatsaih a ni a. Clinic hrang hrang hawn niin, natna hrang hrang neite leh taksa hriselna inthlithlai duhte tan remchanna siam a ni a. Inkaichhawn theih loh natna lam te, zuk leh hmuam kaihhnawih lam te, rilru hriselna lam te, HIV/AIDS kaihhnawih lam te, ECG, Ultrasound, Family Planning & Councelling bakah Mobile Medical Unit thlenga buatsaih a ni a, khawl changkang zawk hmanga sample endik tulte pawh lak a ni a. He hunah hian Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihnate pawh kalpui niin, Specialist leh Doctor thiam tak takte chu mipui rawn theih turin clinic hawngin nilengin an ṭhu a ni.

Chhinchhiah danin vawiina Block Level Health Mela buatsaihah hian damlo mai bakah mahni hriselna thlithlaia inentir mi 876 an awm tling a, remchanna leia Doctor hrang hrangte rawn khawp nghal an awm nual bawk a ni. He hunah hian Champhai atangin DMS Dr. Zatluanga hovin Doctor 11 leh an thawhpuite, an vaiin mi 30 chuang an tel thei a, Khawbung PHC MO leh Staff mi 15 ten an tawiawm bawk a ni.  

Hriselna Kutpui hi April ni 18 atanga 29, 2022 chhung hian India ram puma District hrang hranga Block Level tinahte neih tura ruahman a ni a. Undivided Champhai District bikah a hmasa ber ni turin April ni 18, 2022 khan Hnahlan PHC ah Champhai RD Block tan neih a lo ni tawh a. Vawiina Khawbung RD Block tana Khawbung PHC a neih zawh hnu hian April ni 26 hian Khawzawl RD Block tan Kawlkulh PHC ah neih tum niin, April ni 29 hian Ngopa RD Block tan Ngopa PHC ah buatsaih tum a ni bawk.