No.3628/2020-2020

Vawiin chawhnu khan Health Minister Dr. R. Lalthangliana’n Mizoram sawrkarin tunhnaia khawchhak lama lirnghing tuartute hnem tura a tirh Team hrang hrangte chu a pisa a lengah a sawm a, an hmalakna leh an thil hmuh chi hrang hrangte an sawiho. He hun hi Champhai South bialtu MLA, Minister of State ni bawk Pu TJ Lalnuntluanga, Champhai North bialtu MLA Dr. Z.R. Thiamsanga leh East Tuipui bialtu MLA Pu Ramthanmawia ten an hmanpui a ni.

Health Minister chuan COVID-19 hripui vanga rilru hlauthawng taka kan awm mek laiin Mizoram khawchhak lama kan unau ten vawi 90 chuang zet mai lirnghing an tuar hi Zoram mipuiten kan khawngaihin kan ngaihven a, kan ngaihtuah em em a ni tih sawiin, tih theih kan nei tam lo chungin kan rilru leh ngaihtuahna ah an awm reng a ni tih hria se a duh thu a sawi a. Sawrkar pawhin a ngaihpawimawh avangin tun hnaiah pawh Medical team 3, Mizoram University hnuaia Psychological Support and Guidance team 7 leh Geology & Mineral Resources department hotute khawchhak lama lirnghing tuarte ngaihven a, an harsatnate enpui tur leh a tul ang anga hnem turin a tir a ni a ti a. Anni bakah hian Minister leh MLA te pawhin an tlawh reng a, Champhai district-a MLA te pawhin mipuite thlamuan turin an awmchilh bakah a theih ang angin an tlawh reng a, an hnathawh a chhuanawm hle a ni a ti bawk.

Lirnghing tuarte tana Zoram mipuite inpeknaah lawmthu sawiin tlawmngai pawl leh mimal ang te pawh a a tul anga che chhuak tura inhuam an tam thu a sawi a, thlamuang taka awm turin a chah bawk a ni.

Mizoram sawrkar chuan July ni 9-13 inkar khan Mizoram University hnuaia Psychological Support and Guidance team 7 lirnghing tuarte tlawh turin a tir a, anni hi team khatah mi 4 zela insem darhin khaw hrang hrang 31 an tlawh a. Medical team 3 hian July ni 20-25 inkar khan team khatah mi 3 zela insem darhin khaw hrang hrang an tlawh a, damlo tanpui ngaite en zelin an cham hun tura ruat bakah nikhat dang an cham belh a, an cham chhung hian damlo 1770 an en a, a tul angin damdawite an sem nghal bawk a ni. Geology & Mineral Resources department hotute hian lirnghin hnu hian vawihnih tlawhin uluk takin an zirchiang a, lirnghing chungchanga mipuite hriattur chi hrang hrangte an hrilhfiah bawk a ni.

Vawiin hun hmanpuitu Minister of State Pu TJ Lalnuntluanga, Dr. ZR Thiamsanga, MLA leh Pu Ramthanmawia MLA te pawhin thu sawiin lirnghing vanga an bial chhunga mipui mangangte chunga Zoram mipui leh sawrkarin an lainatna leh ngaihsakna an lan tir avanga an lawm thu an sawi a, thlamuan an mamawh lai tak leh mithiam an mamawh lai taka sawrkarin hma a la chu an bial mipuite aiawhin thinlung takin lawmthu an sawi a ni.