Vawiin khan Art & Culture Minister Pu PC Zoram Sangliana chuan Dinthar Branch YMA, Taitesena Section buatsaih khawhar hlabu ‘Khawhar Hnemtu’chu a chenna in, Tuikhuahtlangah a tlangzarh.
Pu PC Zoram Sangliana chuan Taitesena Section, Dinthar Branch YMA ten hlawhtling taka khawhar hlabu tha tak an buatsaih thei chu lawmawm a tih thu a sawi a. Khawhar hla te hi kan hnamin a mamawh, Mizo hnam awm chhung zawnga ral lo tur a ni tiin kan mi ngaih kalta te chenna hmunah Pathian fak leh chawimawi nan kan la hmang ngei dawn a ni, a ti a. YMA Branch hrang hrang leh hmun hrang hranga khawhar lusun fa tam tak te tan malsawmna a nih theih nan duhsakna a hlan a ni.
He hlabuah hian lengkhawm zai a sak chi hla 121 leh Solfa zaia sak chi hla 80, a vaiin 201 a awm a. Bu khat hi Rs 100 zela lei theih a ni.
