MIFCO in hun rei tak ata a lo enkawl tawh Sapthei tui sawngbawlna Chhingchhip chu harsatna hrang hrang avangin hun engemaw chen a khaihlak a, Sapthei chingtute pawhin harsatna he mi avang hian an lo tawh phah thin a ni. Sapthei chin hi NLUP hnuaiah telh a ni a, sapthei chingtuten an thei tharchhuah tha taka an hralh zel theih nan Mizoram sorkar chuan MIFCO in harsatna a tawh sutkian nan kawng hrang hrangin hma a la mek a, a tul angin MIFCO hi thuam that chhoh mek a ni. Sapthei pawh hi MIFCO hian a lei sak thei reng dawn a. A chingtute hnenah a leina man pawisa pawh pek nghal zel a ni dawn bawk a ni.

Vawiin khan MIFCO Chhingchhipah Sapthei hi lei tan niin Mizoram hmar lam Khawlian atanga rawn phurh thlen Sapthei quintal 10 chu Kg 1 Rs. 12 rate in leisak an ni. Sapthei huan siama eizawn hi a hlawk em em a, hmun zau lutuk lo atang pawhin sum tam tak lakluh theih a ni. Mizoram sorkar chuan kuthnathawktute chhanchhuah leh chawikan chu thupui berah neihin harsatna an tawhte pawh hriatpuiin a sutkian dan te pawh a tul angin a ngaihtuah chho zel reng a ni.