Khawpui fai ber neih tuma Mizoram sawrkar hmalakna, Swachh Survekshan 2018 Roadmap chu vawiin khan Urban Development & Poverty Alleviation (UD&PA) Minister Pu Zodintluanga'n a pisaah a tlangzarh. 

Sawrkar laipui  Ministry of Housing & Urban Affairs chuan khawpui a lo fai zawk nan 'Swachh Survekshan 2016' ruahmanin India rama khawpui 73-te an lo inel tawh a. Swachh Survekshan 2017 chu January atanga February, 2017 ah ruahman lehin khawpui 434 an in el ve thung. Swachh Survekshan 2016 inelnaah khan Aizawl khawpui chu khawpui 73 zingah 41-na  a ni a, kum 2017 ah thung chuan Atul Mission for Rejuvenation and Urvan Transformation (AMRUT) khawpui 500 zingah 105-na a ni. Swachh Survekshan 2018-ah khawpui 4041 an inel dawn a, Mizoram chhung atangin khawpui 23 an tel dawn a ni. 

UD&PA Department hmalakna hnuaiah Mizoram sawrkar chuan January atanga February, 2018 chhung hian Swachh Survekshan 2018 hi kalpui a tum a. Ministry of Housing & Urban Affairs in Swachh Survekshan 2018 kalpui nan toolkit a siam hman dan tur hrilhfiahna leh Mizoram chhunga Swachh Survekshan kalpui dan tur ruahmanna chu a lehkhabu buatsaihin Swach Survekshan Roadmap tih a vuah a. Vawiin chawhma khan UD&PA Minister Pu Zodintluanga chuan a tlang zarh a ni. November ni 1, 2017 hian Swachh Survekshan Nodal Officer ho tan 'Sensitization Workshop on Swachh Survekshan' chu neih tura ruahmanna siam a ni bawk. 

Kum 2017 hi Mizoramin Cleanliness Week a hman kum 40-na (Ruby Jubilee) kum a nih angin UD&PA Department-in a duan, Action Plan for Cleanliness Year 2017-2018 chu UD&PA Minister Pu Zodintluanga chuan October ni 2, 2017 khan a tlangzarh a. New Economic Development Policy hnuaiah Sanitation hi  peng pawimawh tak pakhata telhin Mizoram Sanitation Task Force chuan chak takin hma a la mek bawk. UD&PA hmalakna vekin kumin hian Mizoram khawpui fai ber inelna buatsaih a ni a. Thuang hniha kalpuiin category-I leh a pumpui tehnaah Biate khua chuan pakhatna lawmman a dawng a ni. Biate khawpui hi India ram pum inelna Swachh Survekshan ah pakhatna dinhmun a luah ngei theih nan nasa taka hmalak tum a ni bawk.