No.3443/2020-2020

Kawrthah, the 25th July, 2020 : Kolasib leh Mamit District tlawha thang mek Pu H.Lalengmawia IAS, Health Secretary chuan vawiin hian Zawlnuam chhuahsanin Kawrthah leh Kawrtethawveng khua a tlawh.

Amah lo lawmna inkhawm Kawrthah CHC a neihah thusawiin Pu H.Lalengmawia IAS, Health Secretary chuan, Kolasib leh Mamit district huam chhunga khaw hrang hrang, COVID-19 dona kawnga hnathawktute zawng zawng hnenah chibai bukna thu a sawi a.

 "COVID-19 hripuiin min tih luhai hle laiin ram leh hnam kan him a, kan dam theihna tura mi inpe kan neih che u avangin in chungah sawrkar a lawm em em a. Theihtawp chhuah chhunzawm zel turin ka ngen che u a ni" a ti.

Pu H.Lalengmawia IAS chuan, khawthlang tlang dung hmasawnna tura sawrkar ruahmanna te tarlangin, "Chief Minister remhre tak kan nei a, a kaihhruaina hnuaiah Health Minister chak tak kan neih bakah Sports Minister, a ngaihna hria kan nei bawk a. Anni kaihhruaina hnuaiah hian khawthlang tlang dung hian nakin lawkah chuan hmasawnna rahbi thar kan la chuang kai dawn a ni." a ti.

Secretary hian Sports Infrastructure tih changtlunna tur cheng vaibelchhe 1250 Mizoramin a dawn tur aṭangin khawthlang tlangdung chuan Sports discipline hrang hrang hmunhmaah te nasa takin hmasawnna hmel thar a hmu dawn a ni a ti a. Mizoram sawrkar ruahmanna in district tinah Sport Office din vek tum a nih thu a sawi bawk.

Secretary chuan hun eng emaw chen ngaihthah leh cheihnum lohva lo awm tawh Kanhmun PHC building pawh a hmunah a tlawh a. Building hi renovate a, thawktu te pawh a ṭula dah turin ruahmanna a siam pui bawk.

Mamit District hospital pawh cheng khum 100 awm theihna tura sak chhunzawm thuai a nih tur thu a sawi. Health System Strengthening atana sum lo kal tur vaibelchhe 250 aṭangin Mamit district pawh chawikan mek a ni thu leh, Aspirational District a nihna anga hriselna kawngah theihtawp chhuahpui a nih tur thu a tarlang bawk.

Health Secretary chuan khawthlang tlang dung mipuite chu zirna ngai pawimawh lehzual turin a chah a. Hriselna kawnga thawktute pawh IMR leh MMR a tlakhniam theih nan in lama nau neih a lo tlem a, damdawiina nau neih nachang kan lo hriat deuh deuh theih nana zirtirna kalpui uar zel turin a chah bawk a ni.

Health Secretary chuan heng a kalna khuaah te hian COVID-19 dona leh infiamna hmanrua te a ṭul angin a sem nghal zel a ni.

Health Secretary hi Pu Lalsawma Pachuau Joint Director (F&D) Dr. Lalthanpara, Deputy CEO, Mizoram State Health Care, Dr James RE Mawia leh Health Department Oficials dang ten an ṭawiawm a ni.