No.6947/2020-2021

Vawiin chawhnu khan Circuit House Conference Hall, Kolasibah Pu.K.Lalrinliana, Local Administration Department Minister chuan Kolasib khaw chhung a Village Council President 12 hovin thutkhawmna hun a nei a. Dr. K.Pachhunga, MLA, Vice Chairman, Bamboo Development Board-in telpuiin Pu ST Lalhmingmawia, DLAO, Kolasibin hun a kaihruai a ni.

Minister Pu.K.Lalrinliana chuan Kolasib khaw chhung a Village Council President tling tharte lawmna thu sawiin khawtlang tan a hmasawnna thlentu nih tum theuh turin a chah a," Khawtlang tan a hna kan thawhna kawngah thil tangkai, ro tling leh zahpuiawmloh takin hna kan thawk tur a ni," a ti a," Endikna kalpui a nih dawn vang chauh a hna thawk tha ni lovin khawtlang tan a thil tha tih duh vang zawkin kan thawk tha tur a ni,” a ti bawk. Minister chuan Kolasib district paltlanga 4-lane kawng kal tur chungchang sawiin felfai taka lo in ruahman lawk a pawimawh thu a sawi a, ruahmanna felfai nei tur chuan thawh hona tha a awm hmasak a tul thu a sawi bawk a ni. LAD Minister chuan hrileng karah inhlawh duh leh hlawhfa ruai duh te awlsam zawk a indawr tawnna a awm theih nan Village Council hnuaiah mumal tak a inziahluhna leh inbiakpawh theih nan ruahmanna awm thei se a duh thu a sawi a, hei hian nasa takin nitin inhlawhfaa eizawngte leh hlawhfa rawih tur mamawhte tan thil tangkai tak a nih tur thu a sawi bawk a ni.

Dr.K.Pachhunga, MLA chuan Covid-19 hrileng dona kawngah Village Level task Force hnathawhna avangin Mizoram chu sawrkar laipuia hotute thleng a hriat hlawh a nih thu a sawi a,” India ram state dang a an neih ve loh VLTF kan nei hi Mizoram hian kan vanneihpui hle a ni,” a ti. MLA te chuan VCP te chu khawtlang aiawh a thlan tlin an nih angin khawtlang a an mawhphurnate chu tha tak a hlenchhuah tum theuh turin a chah bawk a ni.

Vawiin thutkhawmnaah hian Kolasib khaw chhung Village Council hrang hranga khawtlang tan a hmasawnna hna kalpui dan tur sawiho a ni a, hnathawhna kalpuina a harsatna awm thei te leh a chinfel dan turte pawh sawi a ni bawk.