2328/2022-2023
Khawzawl, the 14th October, 2022: District Sericulture Office Khawzawl bultumin Sericulture Department kaltlanga Sawrkar flagship programme, Socia Economic Development Programme (SEDP) hnuaia Family Oriented SEDP hamthatna dawngtute tan vawiin chawhma dar 10:30 khan Khawzawl Electric Veng YMA Hall-ah training buatsaih a ni.

He hun hi DSO Champhai leh Khawzawl vawng kawptu Pi Hmingthantluangi chuan kaihruaiin, SEDP hnuaia maimaw pangang khawi thlangtute chu Sawrkarin a phut leh beisei ang ngeiin rinawm taka hlawhtlin pui ngei tura hma la turin a fuih a ni.

Training-ah hian Pi Melody C.Vanlalruati, Sericulture Extension Officer leh Pu H.T.Zothanmawia, Sericulture Demonstrator ten zirtirna an pe a, training zawhah hian SEDP first installment Rs. 25,000 beneficiary 63 te account-ah thun sak nghal an ni.

District Sericulture Officer (DSO) hian Champhai District leh Khawzawl District Sericulture-te enkawl kawpin, kumin 2022 chhunga Champhai leh Khawzawl District-a silk pangang khawitute thingtheihmu pangang cocoon thar chhuah zat chu metric ton 3.8 a tling tawh a. Pangngai khawitute cocoon thar chhuahte hi a that dan (quality) a zirin kg ah Rs.150 atanga Rs.350 thlenga hralh thin a ni. Thingtheihmu maimaw pangang bakah hian Muga (Nauthak) maimaw pangang leh Eri (Mutih) maimaw pangangte chu farmer-te hian vulhin cocoon engemawzat an thar bawk a ni.

Ministry of Textile, Government of India hnuaia Silk Samagra 2 kaltlangin 'Sustainable Livelihood through Ericulture in East Mizoram, 2022-2023 & 2023-2024 Project' tih chu Champhai leh Khawzawl District-a beneficiary 300 te tana kalpui turin Sericulture Department chu a inbuatsaih mek bawk a ni.