No.375/2021-2022

Dated Khawzawl, the 3rd May, 2021: Vawiin chawhma dar 10:30 khan Pu Zothanmawia, Deputy Commissioner & Chairman, District Level Task Force on Covid-19, Khawzawl District hovin Khawzawl Town chhunga Covid-19 Executive Team Leader-te leh Village Level Task Force Chairman-te chu DC Conference Hall-ah an thukhawm.

Bawrhsap Pu Zothanmawia chuan Covid-19 Executive Duty leh VLTF te chu mipui himna tura thawk an nih angin an hna a pawimawh hle a ni, a ti a. Zone hrang hranga duty-te chu pawn chhuah phalna pek kawngahte, dan bawhchhia man leh dawr hawn chungchangahte rualkhai taka kal turin a chah a. Zin veivakte pawh sawrkar order-in a phut angin an rawn chhuahna VLTF lehkha an nei em tihte, phai atanga bungraw phur lo lut, backload changa tawi khawmuang an awm em tihte chena uluk taka enfiah thin turin a chah bawk.

Meeting-ah hian Mizoram sawrkar order anga April ni 20, 2021 atanga Covid-19 Containment order kenkawh chungchang thlirletna neih a ni a. Executive Duty Leader ten report pein, tun dinhmunah chuan Khawzawl mipui nawlpuiin sawrkar thuchhuak an zawmin thu an awih a, chutihrualin Covid-19 duty ni si lo, ID awrha chhuak an awm thin thu tarlan a ni.

Khawzawl khawpui chhung leh District-ah hian Covid-19 hrileng darh zel loh nana sawrkarin inkhuahkhirhna a siamte chu khauh taka kenkawh mek zel a ni a. Khawzawl khawpui chhungah Executive Duty team 10 (sawm), sawrkar hnathawk a bika ruat bakah VLTF leh Police-te an awm a. April ni 21, 2021 atanga May ni 2, 2021 thlenga Executive Duty leh Police ten Covid-19 dan bawhchhia an man tawh zat chu mi 187 niin, pawisa chawitir zat tlingkhawm hi Rs. 30,200/- a tling tawh a ni. Hengte hi vantlang hmuna mask vuah lo bakah curfew dan bawhchhiate, dan lova ramri kante, inkhunghran laia dan zawm lo leh a dangte an ni.

Meeting-ah hian Superintendent of Police Pu PC Lalchunglura, DC Office-a Officer-te, Executive Team Leader-te bakah Khawzawl khawpui chhunga VLTF aiawhte an tel a ni.