1685/2026-2027

Dated Khawzawl, the 6th August, 2026: Vawiin khan Swachh Bharat Mission - Gramin (SBM-G) bultumna hnuaia Solid Waste Management (SWM) Vehicle leh vantlang bawlhhlawh bawm Community Dustbin-te khawtlang tana hlanna leh semna inkhawm chu Public Health Engineering Department (PHED) Khawzawl WATSAN Division leh Village Water & Sanitation Committee (VWSC) Kawlkulh-te tangkawp buatsaihin hlawhtling taka neih a ni a. He hun hi Khawzawl Bawrhsap Pu K. Vanlalthiana, District Water & Sanitation Mission (DWSM) Chairman ni bawk chuan khuallian niin a hmanpui a, SWM Vehicle leh Community Dustbin-te chu tualchhung mipuite hman turin a hlan nghal.

Khuallian Pu K. Vanlalthiana chuan he hunah hian khawtlang thianghlimna a pawimawh thu a sawi a. Bawlhhlawh paihna tur SWM Vehicle leh Community Dustbin-te hi a hmangtu leh a enkawltu tur khawtlang leh tualchhung mipuite kutah hlan a ni ta a, khawtlang fai leh thianghlim tluantling an neih theih nan a hmangtu ber mipuiten tha taka enkawla vil zui turin a chah a.

Sr. Executive Engineer, PHED, Er. Liantluanga Chohte, DWSM Member Secretary ni bawk pawhin thu sawiin, SBM-G hnuaia hmasawnna hna hrang hrangte hi khaw tin tana ruahman a nih thu a sawi a. Vawiina SWM Vehicle leh Community Dustbin hlan tharte hi bawlhhlawh sawngbawlna fel tak leh tlo tak tualchhungah a awm zui ngei theih nana tangkai taka hmang turin mipuite a chah a ni.

Vawiin program hi hun hniha then niin, hun khatna hi Kawlkulh VCP Pu C. Rosangliana kaihhruaiin Kawlkulh Town Hall-ah hman a ni a, 15th Finance Commission atangin individual dustbin 400 sem chhuah a nih tawh thu leh in tin daih tur sem chhunzawm a nih tur thu a sawi a. Er. Liantluanga Chohte chuan kalkhawmte chu SWM Rules, 2026 chungchang a zirtir a.

Hun hnihna hi Kawlkulh Plastic Waste Management Center hmunah hman niin, SDO, PHED Er. Freddy Vanlalmuanawma chuan hun a kaihruai a. JE, PHED Pu TBC Lalthangzawna hnen atangin Technical Report ngaihthlak a ni a. He hun hi Kawlkulh leh a chhehvel khua Chhawrtui, Vanchengpui, Dulte, Puilo leh Vankal WATSAN hruaituten an rawn hman pui bawk a ni.