No.5632/2020-2021 

Nimin (30 September 2020) khan Khawzawl Deputy Commissioner Pu Zothanmawia kaihhruaina hnuaiah Khawhai leh a chhehvel khuaa Village Level Task Force (VLTF) te tan Khawhai Community Hall-ah intuaitharna hun hman a ni.

He hunah hian Pu Zothanmawia chuan VLTF te'n Covid-19 hrileng dona kawngah mawhphurhna sang tak an nei tih sawiin, kum chanve chhung zet mai thahnemngai tak a an thawh tawhnaah lawmthu a sawi a. Covid-19 hri vei pungchho zelah thuthang lengvak leh social media-a thu post nazawngte awih lo tur leh, sawrkar atanga chhuak thuchiang leh rintlak a awm hun ngaichang a, DC leh Medical team te nen inthuruala hma la thin turin  VLTF te chu a chah a. Covid-19 positive emaw, contact tracing-a hming lang emaw an awm changin a punlun zawng leh mi tithlabar zawnga hma la loin, dan leh guidelines awm sa nen tangkawp a, chiai lo a hmachhawn thin turin a fuih thar leh bawk a ni.

Deputy Commissioner hi Pu H. Lalramenga, Sub-Deputy Commissioner leh Dr. Helen Lalnunpuii, Medical Officer, Khawhai te'n an tawiawm a, VLTF te hriat tur pawimawh hrang hrang an sawi a ni.

He intuaitharna hunah hian Biate, Khawhai, Sialhawk, Tlangpui, Tlangmawi, Vangtlang, New Chalrang, Tualte leh Chawngtlai atangin VLTF aiawh mi 18 an tel a. Thusawi zawhah hian zawhna leh chhanna hun hlawkthlak tak hman ho a ni.

Khawzawl District chhunga VLTF te intuaitharna hi vawinni hian Kawlkulhah Pu Lalrohlua, Additional Deputy Commissioner leh Pu James Lalnithanga, SDO(S) hoin hman chhunzawm a ni ang a, October ni 6, 2020 ah DC hoin Rabungah hman a ni bawk dawn a ni. Khawzawl town huam chhunga VLTF te tan ni 23.09.2020 khan intuaitharna hun hi buatsaih a lo ni tawh bawk a ni.