513/2024-2025

Khawzawl, 19th May, 2024: Tukin zing dar 07:00 khan  Khawzawl DC Bungalow-ah Khawzawl Bawrhsap Pu K. Lalrohlua hovin Khawzawl khawpui tui lakna Tuichang lui enkawl leh venhim dan tur chungchang sawiho a ni a. He hunah hian PHED Khawzawl Watsan Division EE Pu Liantluanga Chohte leh a thawhpuite bakah; Land Resources, Soil & Water Conservation (LRS&WC) Department, Khawzawl Assistant Soil Conservation Engineer Pu Lalrochhara te an tel.

Pu Liantluanga Chohte chuan tun kar khan Tuichang luidung kilometer 5 zeta thui an zawh thu sawiin, Tuichang lui hi Khawzawl, Kawlkulh, Biate leh Khawzawl District a khaw te zawk hrang hrang te tui tlan a ni tih a tarlang a. Hun lo kal zel turah Khawzawl leh a chhehvel khua ten tui harsatna an tawh loh nan tun atanga hmalak a tul thu pawh sawiin, Pu Liantluanga Chohte chuan Catchment Area leh luidung enkawl chungchangah mipui inzirtir thar a tul tak zet a ni a ti bawk.

Vawiin thutkhawm hian Drone hmanga Tuichang luidung leh a chhehvel thla lak an rel a. Heng thlalak hmang hian khaw hrang hrang VC leh NGO te chu Tuichang lui dinhmun hrilh hriat thar an ni ang a, luidung humhalh a tul zia inzirtir (Awareness Campaign) nan hman a ni dawn a ni.  Sawrkar Department hrang hrang ten luidung leh lui tui humhalh kawnga hmalakna an neih theih nan Khawzawl DC Office kaihhruaina hnuaiah PHE, Forest, Rural Development, LRS&WC, Agriculture, Horticulture etc te nen a ruahmanna siam ni se tiin an rel bawk a ni.