No.1396/2020-2021

Khawzawl 26th. May, 2020 : Khawzawl District Bawrhsap Pu H. Lianzela chuan vawiin chawhma dar 11:00 khan Krishi Vigyan Kendra (KVK), Khawzawl a tlawhin KVK Farmers Training Hall-ah inkawmhona hun neih a hmanpui.

KVK Head and Senior Scientist Dr. Henry Saplalrinliana kaihhruai inkawmhona hun tawi neihah Bawrhsap chuan khawvel pum a COVID-19 hripui leng mek avangin ei leh barah harsatna a thleng chho thei dawn tih sawiin, Agriculture lamah tanlak nasat a tul thu a sawi a. Pu H. Lianzela chuan FCI buhfai chhekkhawl sa avangin tunah hian ramin ei leh barah harsatna tawk lo mahse chhekkhawl sa hi a zawh hunah chuan hmabak a thim hle dawn a ni, a ti a. Ei leh bar tam zawk thar chhuak thei turin tun atanga hmalak a tul thu sawiin, KVK Scientist ten mawhphurhna an nei thui hle tih a sawi a. KVK Scientist te chu loneituten ei leh bar hlawk zawk a an thar chhuah theihna turin ngaihtuahna seng a, an thiamna leh finna te hmang tangkai turin a fuih a ni.

He hunah hian KVK Head and Senior Scientist Dr. Henry Saplalrinliana pawhin KVK hmalakna hrang hrang te tarlangin, KVK Khawzawl chuan District chhunga loneitute chin tur buh leh thlai chi hrang hrangte chu chin tlak anih dawn leh dawn loh enchhinna an nei hmasa thin tih sawiin, Loneituten tunlai thiamna thar zawk an hman tangkai theihna turin zirtirna an pe thin tih a sawi a. Khawzawl District Bawrhsap in KVK Khawzawl a ngai pawimawh a, a tlawh thin chu lawmawm a tih thu a sawi bawk.

KVK Farmers Training Hall a inkawmhona neih zawhah hian District Bawrhsap, District Level Task Force Committee on COVID-19 Outbreak Chairman ni bawk Pu H. Lianzela hian Quaratine Centre atana hman, KVK Farmers Hostel a inkhunghrang mek, Chennai atanga rawn haw Khawzawl District mi leh sa 11 awm te chu a kan a. An dinhmun te zawtfiahin harsatna an nei a nih chuan thuneitute hriattir nghal zel turin a chah a, inkhung hrang mekte hian tun dinhmunah harsatna an neih loh thu leh an awmna chu nuam an tih thu District Bawrhsap hi an lo hrilh a ni.