3074/2023-2024

Khawzawl, 16th December 2023: Mizoram Larsap Pu Hari Babu Kambhampati chuan nimin khan Mizoram hmun hrang hranga Rehab leh Hnuchham In 45-te tan tanpuina a pe chhuak a. Larsap aiawhin vawiin khan Khawzawl Bawrhsap Pu K. Lalrohlua chuan Khawzawl District-a he tanpuina dawngtu Chhanchhuahna Home, Zuchhip  chu pawisafai cheng 10,000 a hlan.

Chhanchhuahna Home, Zuchhip hi Zuchhip khaw hmun hlui ah awmin, kum 2020 khan din a ni a. Ruihhlo ngai ten nun thar an neih theih nan theihtawp chhuahin an thawk thin a, tun dinhmunah mi 30 chuang Home-ah hian awm mek a ni.

Krismas leh Kumthar lawmna atan Larsap Pu Hari Babu Kambhampati hian Mizoram Distrit 11-a Rehab leh Hnuchham In 45 te tan cheng nuai 4 (₹400,000) a sem chhuak a ni.