No.2064/2020-2020  

Vawiin khan Khawzawl District-a Quarantine Centre 16 zinga awm tamna ber JNV-a mi 50 awm zing atangin mi 26 te chuan khunghran an nih hun chhung hmang zovin Quarantine Centre an chhuahsan a, he centre-ah hian midang 24 an la chambang thung.

Kal chhuak turte thlahna hun tawi hmanah Khawzawl Bawrhsap Pu H. Lianzela chuan  khunghran an nih chhunga thuawih taka hun an hman avangin lawmthu a hrilh a, an khua-a an haw hunah pawh midangte zirtirtu ni theuh tur leh he hripui dona kawnga mahni phak tawka lo tang ve theuh tur te, khunghran an nih chhunga anmahni enkawlna kawngah duhthusam lo thil  awm te hre reng lo tur te leh sawrkar leh khawtlang hruaitute tha tichak tu nih tum theuh turin a chah bawk. Inkhawm hi Pi K Ramdingliani, President, MHIP Sub-Hqrs Khawzawl in kaihruai-in Venglai bialtu Pastor  Rev Malsawmtluanga'n hunserh a hmang a, Pi C Lalfakawmi, Health Worker-in chhuak turte Certificate a hlan bawk. Zonal officer, management team leh caretaker ten an telpui bawk a ni.

Vawiin-a chhuakte hi mipa 8 leh hmeichhia 18 an ni a, heti hian Khawzawl District chhung-a Quarantine Centre 16 leh Isolation centre 1 ah mi 168 an la awm mek ani.

Vawiin Vêk khan Bawrhsap hian YMA DAY pual-a thuchah siamin kum 85 chhung zet hmalam pan thei tura YMA  hruaitu lo ni tawh-te leh hruaitu ni mek-te zahna chibai a buk a. YMA chu pawl zahawm leh thianghlim, mi chanhai, riangvai leh lusun chhungte thian ni zel thei tura tang mar reng turin YMA memberte a sawm bawk a ni. Bawrhsap hian YMA Day pual hian chhungkaw thlanbik thenkhat hnenah buhfai a hlan bawk.

YMA Day denchhen vêk hian Khawzawl Group YMA te chuan DLTF Khawzawl hnenah Covid 19 dona-a a tul apianga hman atan Rs. 20,000.00 an hlan a, Delhi-a awm mek hming thup-in DLTF hnenah Rs.20,000.00 a rawn pe bawk.  Pu R Liankunga Zaingen Veng in DLFT ten a tul tul-a an hman turin a Pick Up a rawn thawh a, Pu R Lalremthanga Hermon Veng in a tupa Birthday pualin Quarantine Centre a awm zawng zawng-te ei atan Vawk a rawn thawh bawk. Quarantine Centre tinah DLTF-in Pu C Ropianga lehkhabu ziah Khat Liam chu a dah vek bawk. Kawnzar VLTF leh Police-te duty na hmun chu remchan zawkna avangin hmun fal leh remchang zawk Chaltheikawn lamah sawn a ni.