81/2026-2027

Dated Khawzawl, the 8th April, 2026 : Vawiin khan District AIDS Prevention & Control Committee (DAPCC), District Nasha Mukt Bharat Abhiyan (NMBA) leh District Narco-Coordination Centre (NCORD) tangkawp buatsaihin Khawzawl district chhunga kohhran hrang hrang hruaitute hnenah drugs leh HIV/AIDS chungchang inhrilhhriatna hun DC Conference Hall-ah neih a ni a. He hun hi Khawzawl Bawrhsap Pu K. Vanlalthiana, DAPCC Chairman ni bawk chuan a kaihruai a ni.

DAPCC Chairmain Pu K. Vanlalthiana chuan thusawiin, Khawzawl chu drugs leh HIV awm lohna hmuna siam tur chuan khawtlang leh kohhran nena thawhho a pawimawh thu a sawi a. Kan rama HIV do rem tur chuan mitinte HIV kan in test-a, kan dinhmun kan hriatchiana, HIV veite chu midang hnena kaichhawng lo tura treatment an lak that a pawimawh thu a sawi bawk a. HIV hi natna dang aiin thinhrik a hlawh bik avangin kohhran hruaitu kalkhawmte chu khawtlanga HIV veite diriamna leh enhranna a tlemna turin leh drugs leh HIV chak zawka do turin thawhho puiah a sawm a ni.

Chief Medical Officer (CMO) Dr. Shahnaz M. Zothanzami chuan HIV hrik chungchang, a inkaichhawn dan, inven dan leh inenkawl dan inhrilhhriatna hun a hmang a. HIV hrik paia inrinhlelhna neite chuan in test ngeia, a vawikhatnaa test a negative pawhin in test nawn ngeia, HIV veite chu midang hnena kaichhawng lo tur khawpa an taksaa hrik a tlem nan ART ei that a pawimawh thu a sawi a. Mizoramah HIV veite zingah mipat hmeichhiatna avanga inkaichhawng an tam ber avangin HIV laka inven dan ABC approach a sawifiah a. Approach tha ber ‘A’ chu Abstinence, mipat-hmeichhiatna laka fihlim a ni a, ‘B’ chu Be faithful, kawppui pakhat laka rinawm a ni a, ‘C’ chu Condom hman a ni a. Kum 15-49 inkar, mihringin hna an thawh theih hunlai ber leh hmeichhiaten nau an pai theih hunlaia HIV an vei chuan anmahni chauh nilovin chhungkua, khawtlang leh ram thlengin a nghawng avangin HIV do kawngah tan kan lak nasat a ngaih thu a sawi.

Khawzawl Addl. SP Pu Zosangliana pawhin he hunah hian drugs hmansual leh a titute hriselna mai bakah chhungkua leh khawtlanga nghawng thalo a neihte sawina hun a hmang a. Kum 1984 atangin October 2025 thleng khan Mizoramah drugs hmansual avanga thi mi 1,952 an awm tawh thu leh January - October 2025 chhung khan mi 73 thi an awm tawh thu a tarlang a. Zuk leh hmuam hi drugs kailawn (gateway to drugs) a ni tih sawiin zuk leh hmuam lakah pawh kan filhlim a pawimawh thu a sawi a. Tun hnaiah Mizoram thalaite zingah ganja ti an tam thu tarlangin ruihhlo ngaite tan nghei a har tawh thin avangin ruihhlo laka fihlima tihchhin loh hi a that ber thu a sawi bawk.

Thusawitu dang District AIDS Control Officer Dr. Albert Lalhminghlua chuan Mizoramah HIV prevalance (mi cheng zat za zela chhuta HIV vei hmuhchhuah tawh leh hmuhchhuah thar belhkhawm) chu 2.73% niin, India ramah a sang ber kan nih thu leh Mizoram district hrang hrang zingah HIV prevalence-ah Khawzawl chu 5-na a nih thu a tarlang a. Prevalance sanna chhan hi Mizorama HIV vei hmuhchhuah tawhten ART an ei thata an dam rei avang a nih thu sawiin, kum 2016 atang khan Mizoramah HIV vei hmuhchhuah thar (incidence) erawh a tlem tual tual tih a sawi.

Mizoram State Positive Network dintu Pi Lalruatfeli pawhin HIV lama a tawnhriatte sawina hun neiin, HIV veite chu an dinhmun zahpui tur an nih loh thu leh midang hnena hrik kaichhawng thei lo tur khawpa ART an ei that chuan kawppuite hnenah pawh hrik kaichhawng lovin chhungkua pawh an din theih thu a sawi a. Khawtlang leh kohhran hruaitute chu HIV veite leh ruihhlo ngaite tan pawha ban phaka an awm a pawimawh thu a sawi.

Vawiin thutkhawmah hian kohhran hruaitute thahnem tak an tel a, HIV leh drugs do kawnga hma lak zel dan turte sawihona hun neih a ni.