No.2022/2021-2022
Aizawl, the 27th August, 2021: Nimin khan Pu C.C. Lalchhuangkima, Deputy Commissioner, Khawzawl District hovin District Level Coordination Committee for Fostering Climate Resilient Upland Farming System in the North East (FOCUS) chu DC Conference Hall-ah an thukhawm.

Pu C.C. Lalchhuangkima chuan FOCUS Project chu kuthnathawktute leh mipuite tana hamthatna tam tak pawchhuak thei a nih thu sawiin, tangkai taka hman a nih theih nan department hrang hranga thawktute chu thawhhona tha tak hnuaiah theihtawp chhuah thin turin a fuih a. FOCUS hamthatna dawngtute hnena thlai chi pek duhtawk mai lova, hlawk leh tha zawka thlai an thar chhuah neih theih nana zirtirna pek leh, enpui zui a pawimawh hle a ni, a ti a. Thlai chingtuten neitu nihna rilru pua an thawh theih nan mawhphurhna pe thiam turin thawktute chu a chah bawk a ni.

Pi Lalnunpuii Parte, Block Agriculture Officer & District Project Manager, FOCUS in a tarlan danin FOCUS Project hnuaiah hian Khawzawl District chu Circle pathumah then niin, Kawlkulh Circle hnuaiah khaw 6 (paruk) a awm a, Khawhai Circle hnuaiah khaw 10 (sawm) awmin, Khawzawl Circle-ah khaw 16 (sawmparuk) a awm a. Loneitu intelkhawm pawl, Farmers Interest Group (FIG) 416 awm mekin, heng zinga 92 te chuan FIG Grant path an dawng tawh nghe nghe a ni.

Khawzawl District-a circle hrang hrang pathumahte hian a ram leilung leh boruak a zirin thlai chi hrang hrang chin thin a ni a. Tun dinhmunah lonei mi chhungkaw 1,358 (sangkhat zathum sawmnga pariat) hnenah thlai chin tur hrang hrang; Thingfanghma, Balhla, Lakhuihthei, RCM (Rice), Vaimim, Soybean, Dragon fruit leh Alu bakah, slake
lime leh leithate sem a ni tawh bawk.

Horticulture Department nena thawhhona kaltlangin Dragon Fruit quintal 42 chuang thar chhuah tawh niin, heng hi District chhung khaw hrang hrang bakah Mizoram chhung leh pawn hmun dangahte pawh thawnchhuah a ni tawh a. FOCUS Project kaltlangin Khawzawl District chhungah tui leh lei luangral tur ven nan check dam 52 siam zawh tawh a ni bawk a. Tuikhawlna leh semna (Water Storage & Delivery System) 20 siam zawh tawh niin, thawh mek lai 6 (paruk) a awm a, chhungkaw 252 tan ram hectare 37.8 a zauah Bench Terracing tih a ni tawh bawk.

District Level Coordination Committee for Fostering Climate Resilient Upland Farming System in the North East (FOCUS) meeting-ah hian District Management Unit, Khawzawl District-a thawkte bakah line department dangte, Rural Development, Horticulture Department, Agriculture Department, Animal Husbandry & Veterinary Department, District Rural Development Agency, Forest (Wildlife) leh District Village Council Association hotute an tel a ni.