No.2773/2021-2022

Aizawl, the 28th October, 2021: Vawiin khan Pu C.C. Lalchhuangkima, Deputy Commissioner, Khawzawl District chuan Hmuncheng khuaa Pu Biakchungnunga in kang chu tlawhin, State Disaster Response Fund (SDRF) atanga tanpuina awmte a hlan.

Hmunchenga khawsa Pu Biakchungnunga in chu tukin dar 3 vel khan bungrua engmah chuh hmanlohin a kangral a. A inneitute hi buh senga ram an riah lai a nih avangin mihring thi leh hliam erawh an awm lo a ni. He chhiatna thleng chungchang hi hriat a nih veleh Khawzawl District Bawrhsap Pu C.C. Lalchhuangkima chuan a hmunah tlawh nghalin SDRF atanga tanpuina Rs. 1,01,900/- a pek bakah hnatlang thingpui inna tur Rs. 2,000/- a pe a. He inkang thenawma mi Pu Hrangchungnunga, Gas bur puak vanga hliam tuar chu Rs. 1,000/- in a kan bawk.

Bialtu MLA leh Deputy Chief Minister ni bawk Pu Tawnluia chuan in kan thu a hriatin pawi a tiin a tawrhpui hle a. Kang tuarte tanpui nan hian a aiawh a kal ten Rangva Bundle 5,  Rs. 2,000/- leh Silpaulin 2 an pek bakah Sub-Headquarters YMA, Khawzawl chuan Rs. 2,000/- leh Silpaulin 2 an hlan bawk a ni.

Khawzawl District Bawrhsap hi bialtu Zonal Officer Pu Ngurthansanga, District Urban Development Officer (DUDO) chuan a tawiawm a. Inkang tuartute tanpuina hlan zawhah hian Hmuncheng Village Council President inah kangmei laka fimkhur dan tur leh kangmei chhuah palha lo hmachhawn dan tur inzirtirna neih nghal a ni.