1467/2022-2023

Khawzawl, the 4th August, 2022: LBS Suzuki All Mizoram Inter Village Football Tournament, 2022  neih zawh taka pahnihna dinhmun hauhtu, Sialhawk VC Team-te puala lawmna hun Sialhawk Community Hall-a buatsaih chu District Bawrhsap Pu C.C. Lalchhuangkima chuan khuallian niin vawiin khan a hmanpui. He hunah hian Pu R.L Zidinga, District Urban Development Officer (DUDO), Saitual District  chu khualzahawm a ni.

Khuallian District Bawrhsap Pu C.C Lalchuangkima chuan Sialhawk VC Team-in Mizorama football inelna lian leh mipuite ngaihhlut hlawh tak LBS Suzuki All Mizoram  Inter Village Football Tournament 2022 neih zawh takah a thiam ber dawttu nihna an hauh thei chu lawmawm tiin, inkhelh mai piah lamah  Sialhawk VC Team, an mahni tantu leh thlawptuten nun dan mawi leh  entawntlak tak an hnutchhiah chu fakawm a ti a. Mite hriat leh hmuh theih tura a tha leh mawi zawnga Sialhawk an tarlang chuan football bakah hlawhtlinna dang an siam a ni, a ti bawk.

Sialhawk chu Lakhuihthei thar chhuah tamna hmun a nih thu sawiin, bialtu MLA Pu Tawnluia, Deputy CM ni bawk hmalaknain ram pawn thlenga thawn chhuak thei tura ngaihtuahna sen a nih thu a sawi a. Tun ang boruak tha Sialhawk khuain a tawng thei chu Pathian malsawmna a nih thu leh Sialhawk khaw thawhrimna leh hlawhtlinna chuan mite thinlungah football ngaihvenna thar a siam thu a tarlang a. Hlawhtlinna chang te chu thlen chinah lungawia duh tawk mai lo tur leh hmasawn zawnga kal tuma theihtawp chhuah chhunzawm zel tura fuihin an kalzelna turah duhsakna a hlan a. Lawmpuina pawisafai Rs. 5,000/- a hlan nghal bawk.

Khualzahawm Pu R.L Zidinga, District Urban Development Officer (DUDO), Saitual District chuan hlawhtlinna chang thei tura tha leh zung, ngaihtuahna leh sum leh pai sengtu zawng zawngte fakawm a tih thu sawiin, infiamna huangah tunhnai chhoah Tuichangralin hmingthatna a hmu chho chu lawmawm a tih thu leh vawngnung zel tura theihtawp chhuah chhunzawm a tul thu a sawi a. Faina kawngah tanlak chhunzawm zel a tul thu sawiin, hmasawnna kawng zawh turin thawhhona tha leh lungrualna neih a tul a ni, a ti a. Sialhawk chu khawfai a nih zel a beisei thu sawiin, thil tha tih kawngah midangte tihhmuhtu nih tum zel tum tur leh, faina leh inpumkhatna kawngah midangte fuihtu nih zel tum turin a chah a, lawmpuina thilpek a hlan nghal bawk.

Sialhawk VC Football Team-te hlawhtlinna lawmna hun buatsaih hi VCP Pu J.Lalremruata, Chairman, Organising Committee chuan a kaihruai a. Pu Lalremchhunga, VC Member-in Bialtu MLA Pu Tawnluia, Deputy CM thuchah leh lawmpuina thuziak thawn a chhiar chhuak a. Deputy Chief Minister hnen atanga lawmpuina thilpek dawn inhlanna neih a ni a. He hunah hian Sialhawk VC Team Coach, Aizawla VC Team thlengtute, Sialhawk Khawchhuak Welfare Committee Aizawl, Khawzawl District Football Association leh Khawzawl District V/C Association aiawh atangtein thusawi ngaihthlak a ni a. Player leh Coaching Staff-te chawimawina hun hman a ni a. Zai, lam, hlado chham te neiin hun hlimawm tak hman a ni a. Pu J.Rampanmawia, Sialhawk VC Vice President-in lawmthu sawiin lawmna hun hi a khar a, hemi hnu hian a lawmna pual khawtlang huapin ruai theh a ni.