Dated Khawzawl, the 30th June, 2021: Khawzawl District Bawrhsap Pu Zothanmawia chuan nimin khan Khawzawl District-a MJA member-te leh Cable TV neitute chu Covid-19 hrileng mek darh zel tur do letna kawnga hmalakna chungchang zirhona DC Conference Hall-ah a neihpui.

He hunah hian District Bawrhsap chuan thu sawiin, Khawzawl district-ah Covid-19 hri kai awm thin mahse tualchhungah inkai darh a awm lo chu lawmawm a tih thu a sawi a, thunun zawh loh khawp hri kai an awm lo chu hri do kawnga thawktute thawhrimna leh mipuite thuawihna vang ni a, a lawmawm hle a ni, a ti bawk.

Pu H.Lalramenga, Sub-Deputy Commissioner (SDC)-in report a pek atanga a lan danin, Khawzawl district-ah Government Quarantine Facilities 31 a awm a, Community QF - 36, Hotel Paid QF pakhat leh Institutional (Company) QF pahnih a awm a, heng zinga panga te hi hman lai mek an ni. Hri vei enkawlna hmun Covid Care Centre (CCC) pathum Khawzawl khawpui chhungah awmin Kawlkulh, Khawhai leh Biateah Comunity Covid Care Centres (4C) pakhat theuh a awm bawk. State pawn atanga rawn lut Quarantine tawh zawng zawng chu mi 1012 niin, quaratine centre-a awm mek mi 75 an awm bawk a ni. Report atanga a lan dan chuan Chief Minister's Relief Fund atangin hri leng avanga chhuanchham tanpui ngaite hnenah tum hnih May ni 21-ah leh June ni 25-ahte tanpuina pek a ni tawh a, chhungkaw 1580 hneah Buhfai, Dal leh Tel pek an ni.

Report a a landanin Khawzawl District-ah hrikai hmuh chhuah tawh chu mipa 81 leh hmeichhia 16, an vaiin mi 97 an ni a, hri kai enkawl dam tawh mipa 76 leh hmeichhia 16, an vaiin mi 92 an awm a ni. April ni 20, 2021 atanga Covid-19 dan bawhchhia man tawh zat chu 386 niin, pawisa chawitir zat tlingkhawm hi Rs 1,04,700/- a ni bawk.

Dr. Lalnunpuii Renthlei, Medical Officer, Khawzawl District Hospital-in Health Department hmalakna tlangpui a tarlan dan chuan, Khawzawl district chhunga hri kai leh kai lo endik tawh zawng zawng chu mi 4969 niin, heng zinga 4042 chu RAgT hmanga endik an ni a, a dang 927-te chu TrueNAT hmanga endik an ni. Khawzawl District Hospital huamchhungah Covid-19 vaccine dose khatna la tawh zawng zawng mi 7608 an ni a, an zinga mi 4215 chu kum 18-44 inkar niin, kum 45 chung lam dose khatna la tawh mi 3393 an awm bawk.

He hunah hian Addl. SP Pu Lalringliana Pachuau pawhin Khawzawl district police ten hri do kawnga hma an lak dan a tarlang bawk a ni.

Khawzawl DC-in Media-te a kawmnaah hian Pu Lalrohlua, Additional DC leh Pu James Lalnithanga, SDO(Sadar) bakah Dr. Vanlalnunfeli, Medical Officer, District Hospital-te an tel bawk a ni.

Attachment

• Loading attachment...