1163/2022-2023

Khawzawl, the 6th July, 2022: Tualpui khuaa MHIP Day vawi 48-na lawmna Centenary Waiting Shed-a buatsaih chu vawiin khan Khawzawl District Bawrhsap Pu C.C. Lalchhuangkima chuan khuallian niin a hmanpui.

Pu C.C. Lalchhuangkima chuan Tualpui khuaa MHIP day hmang theia a awm chu lawmawm tiin khawtlang mipuite MHIP day chibai a buk a. MHIP day khawtlang huapa lungrual taka hmanho a ni thei chu fakawm tiin, hei hian khawtlang tangrual an nih zia a tarlang a ni, a ti a. MHIP day thupui 'Khawtlang hmasawnna tura hmeichhiate mawhphurhna' chungchang sawizauin, "Hmeichhiate ngaihsan zawng hi khawtlang hmasawnna lam hawi zawng zel a ni a. Kan nulaten an ngaihsan ang hi mipaten nih an tum thin avangin hnathawk nasa leh mi taimate hi kan nulaten ngaihsanna chang an hriat a hun ta hle a ni", a ti. Tun hma chuan hmeichhiate hi dinhmun chhe zawk leh dinhmun hniam zawk an nih thin laiin, tunah erawh chuan hmeichhiate dinhmhn hi a tha ta hle a. Kan chhehvel hnam dangte nena khaikhin chuan hmeichhiate dinhmun a thain Sawrkar hnathawk zingah pawh hmeichhiate an tam mai bakah zirlai titha leh pass tha zingah pawh hmeichhia an tam thin hle a ni, a ti bawk.

Bawrhsap chuan chhungkuaa nute pawimawhna tarlangin, chhungkaw tha nei tur chuan nu ten mawh an phur a ni, a ti. Fate lehkha zir enpui leh ngaihsak te, an nitin nunah thiam ang tawka  tel ve chu chhungkaw hlim leh nuam neih theih nana bultanna pawimawh tak a nih thu a sawi a. Faina kawnga nu te pawimawhna pawh sawiin, faina hi chhungkua atanga intan a nih vangin chhungkaw nu berin faina a dah pawimawh chuan khua a bal thei lo a ni, a ti a. Ruihhlo leh a kaihhnawih laka fihlim turin chhungkua atanga bultana inzirtirna nasa lehzual kalpui a tul thu  sawiin, thalaite chu hemi laka fihlim tuma theihtawp chhuah turin a chah bawk a ni.

Khuallian  hian Tualpui khaw MHIP hnenah Volleyball, Volleyball net leh pawisa fai Rs. 3,000, a hlan a ni.

MHIP lawmna inkhawm banah DC hian khaw chhung hmun pawimawh a tlawh kual a. MUP In sak mek enfiahin sak chhunzawm theih dan tur a sawipui a. YMA library leh MHIP in sak mek a tlawh bawk a. Primary School tlawhin zirtirtute nen school mamawhte an sawi ho a. Tualpui panna kawngah Waiting Shed sak a nih theih dan turte leh Vangtlang zunin sak dan turte a enfiah bawk.

Khawzawl DC hi Pu Obed Lalmalsawma, SDC chuan a tawiawm a ni.