923/2022-2023
Khawzawl the 16th June, 2022: YMA Day vawi 87-na chu Mizoram hmun dang rualin Khawzawl-ah pawh khaw hrang hrangah nimin khan hman a ni a. Sialhawk, Khawhai leh Khawzawl Darngawn venga YMA Day lawmna inkhawm chu Khawzawl District Bawrhsap Pu C.C. Lalchhuangkima chuan khuallian niin a hmanpui a ni.

YMA Day lawmna inkhawm buatsaihah thusawiin, khuallian Pu C.C. Lalchhuangkima chuan ruihhlo chu hnam hmelma a nih thu leh thalaite chu ruihhlo laka fihlim tur te, taima tur leh hnathawh zak lo turin a sawm a. Hnathawh kawr nena 'selfie' chu zahthlak loh mai ni lovin, a ropui zawk thu a sawi a. YMA chu pawl thianghlim leh ropui tak a nih thu sawiin, mi thenkhat avangin pawl pumpuiin dem leh beih a tawk hi a dik lo a ni, a ti. Thalaite chu ram leh hnam humhalh kawngah theih tawp chhuah thin turin a sawm a ni.

Chawhma dar 10:00 ah Sialhawk Community Hall-ah YMA Day lawmna inkhawm hi hman a ni a. Pu V.L. Lampuia, Br. President-in inkhawm hi a kaihruai a, Pu RS Lalrinsanga, CEC, Central YMA chuan inkhawm hi a hmanpui bawk a ni. Sub Hq. YMA leh Tuichangral North Group YMA atangin thusawi ngaihthlak a ni a. Member thite sunna hun neih niin, lengkhawmzai hmangin intihsiakna neih a ni bawk.

Chawhnu dar 1:00 ah Khawhai Town Hall-ah YMA Day lawmna inkhawm hi buatsaih a ni a. Pu Lalhriatkima Chhangte, Br Asst Secretary in inkhawm hi a kaihruai a, section hrang hrang atangin zaithiamten zaiin mipui an awi a ni.

Zan dar 8:30 ah Darngawn Branch YMA Hall-ah YMA Day lawmna inkhawm buatsaih a ni a. Pu Vanlalzara, Branch President-in inkhawm hi a kaihruai a. Member thite sunna neih a ni a, YMA Day puala intihsiakna result puan a ni a, zirlai tithate chawimawina hun hman a ni bawk.