No.3241/2021-2022

Aizawl, the 2nd December, 2021: Nimin khan District Disaster Management Authority, Khawzawl District leh National Service Scheme (NSS), Khawzawl Higher Secondary School-te tangkawp buatsaihin Zaingen Branch YMA Hall-ah Khawzawl HSS zirlaite tan chhiatrupna hmachhawn dan inzirtirna, 'Capacity Building Training for Response to Disasters' neih a ni a. He hun hi Pu C.C. Lalchhuangkima, Deputy Commissioner & Chairman, Khawzawl DDMA chuan khuallian niin a hmanpui a ni.

Training hawnna hun Pu Kamdingliana, Programme Officer, NSS & Lecturer, Khawzawl HSS kaihhruaiah khuallian Pu C.C. Lalchhuangkima chuan thu sawiin, chhiatrupna chu engtiklai pawha thleng thei, chiai lo leh rilru fim taka hmachhawn ngai a ni, a ti a. Chhiatrupna hmachhawn tura kan bula hmanraw hrang hrangte tangkai taka hmang thei tur leh, midangte zirtir chhawng thei tur chuan training neih fo a tul thin tih a sawi a. NSS volunteer-te chu nakin lawka nula tlangval tur, YMA leh khawtlang pawhin a rinrawl ber tur an ni tiin, rilru inhawng leh thiam tumna neia training theuh turin a chah a ni.

Pu Lalrohlua, Additional Deputy Commissioner & CEO, Khawzawl DDMA pawhin thu sawiin, Disaster Management chuan chhiatna thlen hnua tanpuina leh chhawmdawlna pek piahlamah a thlen hmaa lo inrinlawk dan inzirtirte, chhiatna thleng thei laka inven dan ngaihtuaha plan lo siamte a huam tel vek a ni, a ti a. Training tura kalkhawm zawng zawngte lawmna thu a sawi bawk.

Pu H. Lalramenga, Sub-Deputy Commissioner & Nodal Officer, DM&R chuan powerpoint presentation hmangin lirnghin laia tih tur leh tih loh turte, State Disaster Response Fund (SDRF) atanga tanpuina awm theite zirtirna a pe a. Khawzawl DDMA hnuaia Quick Response Team member-ten chhiatrupna a thlen changa mipui vantlang tana chhanchhuah hna thawh dan, 'Community-based Search and Rescue Technique' hrang hrang an entir bakah First Aid chungchangte, hliam tuar zawnna siamchawp dante, QRT hmanraw hrang hrang sawifiahna leh a hman dan inzirtirnate an pe a ni. Heng inzirtirnaahte hian zirlai naupang a tam thei ang ber a taka tihtir ve zel an ni bawk.

Nimina training-ah hian Khawzawl HSS zirlai 200 bawr vel an tel a. Pu K. Lalremruata, LDC, DC Office chuan lawmthu sawiin training a khar a ni.