No.2086/2021-2022
Aizawl, the 1st September, 2021: Vawiin chawhnu dar 1:00 khan Khawzawl District Disaster Management Authority chuan Chairman Pu C.C. Lalchhuangkima, Deputy Commissioner hovin Khawzawl District-a Covid-19 positive case pungchho zel chungchang ngaihtuahin DC Conference Hall-ah an thukhawm.

Vawiin meeting-ah hian DDMA member-te bakah Chief Medical Officer, Champhai District leh Khawzawl Town huam chhunga Village Level Task Force (VLTF) Chairman-te an tel a. Tunhnaiah Khawzawl District, a bikin Khawzawl khaw chhungah Covid-19 positive case a pun chak em avangin inkhuahkhirhna khauh zawk kalpui turin Khawzawl Town huam chhung chu zanin dar 7:00 atangin Restricted Area-a puan an rel a, hemi hun chhung hian dinhmun chiang zawk hriat a nih theih nan mass testing kalpui turin an rel bawk a ni.

Restricted Area huam chhungah hian chhiat tawhna leh medical emergency tih lohah chuan mahni in compound chhuahsan phal a ni dawn lo a. Hna pawh mahni in compound chhungah bak thawh phal a ni dawn lo a ni. Hemi hun chhung hian dawr hawn phal a nih dawn loh avangin mamawh nei bikte chu an awmna veng VLTF ten a tul angin an buaipui thin ang. Loh theih loha sawrkar office kal turte pawhin office kal phalna order, hminghmerha office hotute siam ken zel tur a ni dawn a ni.

Vawiin tlai dar 4:00 thleng khan Khawzawl District-ah Covid-19 vei mek mi 85 (sawmriatpanga) awmin, heng zinga 55 te chu Khawzawl Town chhunga mi an ni a. Covid-19 active case awm mekte hi an vaiin tunhnai ni 5 kalta chhunga hmuhchhuah vek an ni.

Tun dinhmunah Khawzawl Vengthar Neuva Section leh Biate khuate chu Containment Zone-a puan tawh niin, ni 27.08.2021 atang khan Khawzawl Town bikah chuan No Tolerance Week hman a lo ni tawh bawk a ni.

Attachment

  • Loading attachment...