4063/2025-2026

Khawzawl, dated 20th January, 2026: Vawiin khan Khawzawlah District Agricultural Marketing Committee (DAMC) chu an Vice Chairman, Khawzawl Addl. DC Pu K. Zorammuana hovin DC Auditorium-ah an thukhawm.

He meeting-ah hian Hand holding (Bana Kaih) Scheme, 2024 hnuaia thlai thar marketing chungchang sawi ho a ni. District Agriculture Officer leh Member - Secretary ni bawk, Pi Lallawmzuali chuan Khawzawl District atanga Sawhthing lei leh hralh dan tur ruahhmanna te nikum 2025 a hma an lo lak dan te sawiin agenda sawi hawnna a nei a, Bana Kaih Scheme hnuaia kumina Sawhthing lak khawm hna hi Feb 2026-ah Khawzawl District-a Secondary Collection Centre (SCC) hmun parukah nei leh tura ruahman a nih thu a sawi.

Vawiin meeting-ah hian Sawhthing lei leh hralh danah kuthnathawktute leh a leitu ten harsatna an tawh lohna turin SCC Supervisors and Coordinators te leh PCC and SCC Member te Training neih dan turte bakah, SOP te enho niin, tha zawka kalpui a nih theih dan turte sawiho a ni bawk. Tin, SCC member siam rem ngai leh ruatbelh ngai chung chang pawh sawiho a ni bawk.