54/2022-2023
Khawzawl, the 5th April, 2022: Vawiin chawhnu dar 2:00 khan Pu C.C. Lalchhuangkima, Deputy Commissioner, Khawzawl District kaihhruaiin DC Conference Hall-ah African Swine Fever (ASF) dinhmun thlirhona leh, Khawzawl District-a ASF a lên nawn lohna tura hmalak dan tur ngaihtuah a ni a, District dang atanga vawk, vawksa leh vawksa atanga thil siamte lakluh khap nise tiin an rel.

Vawiina meeting-ah hian Dr. Philip Lawmsangzuala, Veterinary Officer chuan tunhnaiah Khawzawl District-ah vawk thi report awm ve tawh mah se vanneihthlak takin ASF a ni tih finfiahna a la awm rih lo tih a tarlang a. Chutihrualin District thenawm leh Mizoram hmundangahte ASF avanga vawk thi engemawzat a awm chhoh reng avangin fimkhur a ngai hle tih a sawi.

District Bawrhsap hova meeting chuan ASF vanga vawk vulhtute mai bakah mipui nawlpuiin harsatna an tawh theih dante uluk taka ngaihtuah chungin, District pawn hmundang atanga vawk, vawk note, vawksa leh vawksa atanga siam thil engpawh lakluh khap nise tiin a rel a. District chhung khaw pakhat atanga khaw danga vawk leh vawk note lalut duhte pawhin A.H&Vety Department hnen atangin phalna lak hmasak zel nise tiin an rel bawk a ni.

Meeting-ah hian Additional SP Pu Lalringliana Pachuau, SDO (Sadar) Pu James Lalnithanga, SDC Pu H. Lalramenga te bakah District VC Association, Joint VC Khawzawl leh Khawzawl Vawkvulh Association aiawhte an tel a ni.