No.5123/2020-2021
Dated Khawzawl, the 15th September, 2020: Tunlai hripui leng mek Covid-19 chuan Mizoram run mekin mi engemawzatin he hri hi an kai tawh a ni. Hripuiin Khawzawl District pawh a lo luhchilh tak avangin mipuite an fimkhur zuala hri laka an him theihna turin Khawzawl District Bawrhsap Pu Zothanmawia, Chairman, District Level Task Force on Covid-19 ni bawk chuan mipuite zawm tur hriattirna hetiang hian a chhuah:
1. Ram pawn/state pawn atanga rawn haw tur reng rengte chu an rawn haw hma ngeiin an awmna veng/khua Village Level Task Force (VLTF) hnenah an chhungte'n an hriattir hmasa phawt ngei ngei tur a ni. VLTF ten Police leh anmahni bialtu Zonal Officer hnenah emaw, DC Office- ah rang takin report an thehlut thin ang. Sawrkar department/Company, state pawn atanga lo kal tur mikhual emaw, hnathawk tur nei pawhin DC leh Police hnenah report zel tur a ni. Report-ah hian rawn haw tur Hmingpum, kum zat, Nu/Pa Hming, Home Address, Rawn hawna State, an rawn chhuah hun leh thlen hun tura beisei bakah anmahni biakpawh theihna tur phone number-te tih tel tur a ni.
Inhriattirna turte chu:
i) Khawzawl Police Station: 9862423388
ii) Zonal Officer-te
iii) DC Office (SDC mobile no.): 7005968251/9940515224
2. Ram pawn/state pawn atanga rawn haw tur inhriattirte hi anmahni bialtu Zonal Officer te'n lo ngaihtuah zuiin, an rawn thlen laiin Police duty point, Kawnzar-ah an lo hmuak ang a. Zonal Officer leh Police te'n an awmna tur Quarantine Facility ruahman sa thleng an hruai thin ang.
3. Aizawl atanga Khawzawl District a lo zin/hawte pawh an awmna veng/khua VLTF hnenah an inhriattir hmasa phawt zel tur a ni.
4. Mitinin kan zawm theih, face mask hmanga hmai tuam leh sahbawn/hand sanitizer hmanga kut silfai ngun hi a la pawimawh reng a ni mai lo a, a hma aiin a pawimawh tawlh tawlh tih hriain inthlahdah hauh lova chhunzawm zel tur a ni.
5. Chhungkaw tinte tul bik thilah lo chuan pawn chhuah leh midang kawm/lenpawh loh nise, a tam thei ang ber mahni inah inkhung tur a ni. Thil tul ti tura kan chhuak anih chuan social distancing ngaipawimawh leh vawng tlat chungin kan chhuak tur a ni.
6. Khawzawl District mipuite khawchhung leh khaw kar kawngah Lirthei hriatchian lohah chuang lo turin kan inngen a. A bik takin ram pawn/state pawn atanga rawn hawte phurtu Lirtheiah chuan hauh loh tur a ni.
7. Khawzawl District chhunga Dawrahte leh heng infiamna hmun, gymnasia, spa, haircutting saloon, beauty parlour etc. ah te hian Register hmangin a dawrtute leh lut leh chhuak bio-data (Hmingpum, Address, Phone number) te chhinchhiah zel tur a ni. Register-ah hian a dawrtute ni lovin, dawr nghaktuin a ziak thin tur a ni.
8. Public transport heng - Sumo, Auto rickshaw, Taxi etc. khalhtute'n mask vuah leh kut silfai uar tur a ni. Passenger-te hman tur hand sanitizer an pai reng tur a ni a, passenger te'n Lirthei an luh hmain hand sanitizer hmangin an kut an tifai thin ang. Tin, Lirthei khalhtuten a zing thei ang berin Lirthei chhung, thutna leh vawnbante uluk takin an tithianghlim thin tur a ni.
9. Khawzawl District chhunga Hotel leh thingpui dawr neitu leh thawktute'n Face mask hmangin an hmai an tuam ulukin, kut silfai an uar tur a ni a. Dawr luh dawnah dawrtute hman tur hand sanitizer/kut silna an chhawp tur a ni. Social distancing vawn a nih theih nan hma an la ang a, thutthleng leh dawhkante pawh inhnaihchilh lutuk lovin an rem tur a ni.
10. Chhiatni thatni leh a kaihhnawih puipunna hmunahte sawrkar leh VLTF ruahmanna siamte ngaipawimawhin, Covid-19 hripui laka kan him theih nan zawm zel tur a ni.
