No.2098/2021-2022  

Aizawl, the 2nd September, 2021: Vawiin khan Pu C.C. Lalchhuangkima, Deputy Commissioner, Khawzawl District chuan Khawzawl District Headquarters-a Mass Testing neihna hmun leh Covid-19 kaihhnawiha duty-te chu a hmunah tlawhin Khawzawl khawpui chhung a fangkual.

District Bawrhsap Pu C.C. Lalchhuangkima chuan heng hmun hrang hranga duty-te hi an duty-na hmunah tlawhkualin, Covid-19 dona atana hman turin Khawzawl veng hrang hranga VLTF-te hnenah pawisa fai Rs. 2,000/- theuh a hlan a ni.

Khawzawl District Headquarters hi nizan dar 7:00 atang khan Restricted Area-ah puan niin, Covid-19 hrileng dinhmun dik tak hriat a nih theih nan vawiin atangin Mass testing neih nghal a ni a. Khawzawl Vengthar atanga tan niin, a tahtawla veng hrang hrang tuamchhuak tura ruahmanna siam a ni. Vawiin chawhnu dar 4:00 thleng khan sample 543 chuang hret test tawh niin, Mass testing bik atang chuan Covid-19 positive hmuhchhuah a la awm lo a ni.

Khawzawlah hian Covid-19 hrileng darh zel tur venna atana inkhuahkhirhna siamte kengkawhin hmun hrang hrangah VLTF, Executive Duty, YMA leh Police-te chu vawiin atangin ngawrh lehzualin an duty a. Veng hrang hranga duty-te tarlan danin mipui ten thupek an zawm tha a, dan bawhchhia man leh duty-te tana harsatna siam zawnga khawsa an awm lo a ni.

Vawiin chawhnu dar 4:00 thleng khan Khawzawl District-ah Covid-19 positive case 13 (sawmpathum) hmuhbelh a ni a, tun dinhmunah active case mipa 55 leh hmeichhia 53, an vaiin mi 108 an awm mek.

Mass Testing neihna hmun leh Duty post tlawhkualnaah hian Pu James Lalnithanga, SDO(Sadar) leh Pu H. Lalramenga, SDC ten Bawrhsap hi an tawiawm a ni.