1757/2022-2023

Khawzawl, the 31st August, 2022: Khawzawl District chhunga bank hrang hrang leh stakeholder line department kaltlanga hmalaknate thlirletin District Consultative Committee (DCC) chu nimin 30.8.2022 khan an Chairman, District Bawrhsap Pu C.C. Lalchhuangkima hovin DC Conference Hall-ah an thukhawm. He hunah hian June 2022 quarter tawp thlenga Khawzawl District-a  hmalaknate thlirho a ni. He hunah hian Lead District Officer (LDO) Pu Siddharaj, Manager, RBI Aizawl; Pu Jyoti Munna Soren, Lead District Manager (LDM), SBI Lead Bank Office Champhai; Line Department hotute leh Banker-te an tel a ni. 

Meeting-a tarlan a nih danin June 2022 quarter chhunga Khawzawl District-a bank hrang hranga pawisa dahluh leh pekchhuah tam zawng inthlauhna khaikhinna Credit Deposit Ratio/CD Ratio chawhrual chu 69.37% a ni a, quarter hmasa March 2022 quarter tawpa CD Ratio 66.11% atangin 3.26% in a pung a, hei hian CD ratio tha ni tura hniam lam bituk zat 60% chu 9.37% in a khum a ni. Hemi hun chhung hian bank-ah cheng nuai 16421.06 dahluh a nih laiin bank-in pawisa a pekchhuah zat hi cheng nuai 11392.40 a ni.

2022-2023 Financial Year chhung June thla tawp thlenga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai 2792 atangin cheng nuai 741.32, za zela 26.55 tihhlawhtlin a ni a, Non Priority Sector hnuaia target cheng nuai 1399 atangin cheng nuai 486.80, za zela 34.80 tihhlawhtlin a ni. Hemi quarter chhung hian Pradhan Mantri Mudra Yojana (PMMY) kaltlangin Sishu hnuaiah mi 13, Kishore hnuaiah mi 27, Tarun hnuaiah mi 8, an vaiin mi 48 te hnenah loan cheng nuai 146 hu pek chhuah a ni bawk.

Kumin June quarter tawp thlenga Social Security Scheme hnuaia inziaklut tawh zat chu Pradhan Mantri Jan Dhan Yojana (PMJDY) hnuaiah mi 14050 , Pradhan Mantri Jeevan Jyoti Bima Yojana (PMJJBY) hnuaiah mi 7256, Pradhan Mantri Suraksha Bima Yojana (PMSBY) hnuaiah mi 9909 leh Atal Pension Yojana (APY) hnuaiah mi 329 an inziaklut tling tawh a. Hemi quarter chhung vek hian Priority Sector hnuaiah Non Performing Assets (NPA) cheng nuai 548.87 (5.70%) leh Non Priority Sector hnuaiah NPA cheng nuai 29 (0.67%) awmin bank chhawr tangkai dan inzirtirna Financial Literacy Campaign (FLC) MRB Kawlkulh, Khawhai leh Sialhawk te kaltlangin tum 5 neih a ni a, mi 475 te zirtirna pek an ni.

DCC thukhawmah hian Customer Service tihchangtlun dan turte, Financial Literacy Campaign uar zawka kalpui dan turte, Bank leh ATM venhim chungchang sawiho niin security report ngaihthlak a ni bawk.

June 2022 quarter tawp thleng khan Khawzawl District-ah Bank branch hrang hrang 7 a awm a, Public Sector Bank 2, Regional Rural Bank 4  leh State Cooperative Bank 1 te bakah ATM 3, Business Correspondent 9, CSP 1 leh IPPB hnuaia Banking Touch Point 18 te a awm mek a. Khawzawl District hi Financial Literacy Centre Champhai leh RSETI (Rural Self Employment Training Institution) Aizawlin a vil a ni.