No.7855/2020-2021

Dated Khawzawl, the 20th March, 2021 : Nimin chawhnu dar 1:00 khan Khawzawl District Disaster Management Authority (KDDMA) chu an Chairman Pu Zothanmawia, Deputy Commissioner hovin DC Conference Hall, Khawzawl-ah District chhunga chhiatrupna hrang hrang thleng thei chungchanga hmalak dan tur ngaihtuahin an thukhawm.

Nimina Khawzawl DDMA meeting-ah hian District Disaster Management Plan siam mek chu uluk taka ennawn a nih hnuah pawm niin, State Disaster Management Authority pawmpuina dil tura thawn nise tih a ni a. Mizoram sawrkar DM&R department atanga lehkha dawn bawhzui nan leh, tunhnaia District chhunga kangmei vanga chhiatna thleng chungchanga hmalak nan Zonal Officer te'n an bial chhunga vantlang hmunhma– School, Community Hall, Biak In leh a dangte kangmei laka a him leh him loh enfiahna  neih theuh nise, kangmei chungchanga mipuite zirtir nan Circular tihchhuah nise tih a ni bawk.

Khawzawl DDMA chuan chhiatrupna lo thleng thei laka inven dante, lo hmachhawn dan leh a tuartute khaichhuah dan tur chungchanga District mipuite inzirtirna buatsaih nise,  DM&R Department nen tangkawpa Mock Drill-te neih thin nise tiin a rel bawk a ni.