No.455/2020-2021

Khawzawl District Level Task Force on  COVID-19 in a lo rel tawh angin, inkharkhip kalpui mekah vawiin atang khan Khawzawl District-ah chuan ei leh in bakah mipui mamawh zual zuar dawr hawn phalsak an ni a, hmasawnna hna hmanhmawhthlak zual   thawh phalsak an ni bawk.

Heng mamawh zuar dawrkai-te chu tlai dar 5 thleng bak hawng lo tur te, kawngka zimtê-a hawng a, dawrtute a mal tê tê a luhtir turte, dawrtute metre khat aia inhnaih lova an intlarna tur lo rin turte leh chhungkaw pakhat tan karkhat tla tawk vel aia tam hralh lo tur te in DLTF chuan a  hriattir a. Dawr inhawngte hi VLTF ten hriattirna an zawm leh zawm loh an thlithlai dawn bawk a ni.

Hmasawnna hna hmanhmawhthlak zual - kawng siam, side drain siam leh a dangte bakah, a bika Khawzawl DC Office atanga phalna neite pawhin hna an thawk tan bawk a ni. Lo leh huana hnathawh pawh phalsak chhunzawm an ni a, amaherawhchu hnathawhna hmunah mi 5 aia tam awmkhawm lo tura hriattir an ni.  

Hnathawh chhuanlama chhuak, ramvak leh lui lama lo kal ta daihte an awm thin avangin hemi venna atan VLTF te chu mahni khua theuhva lo/huan neite list April ni 22 hma-a DC office a thehlut vek tura ngen an ni. Hemi list a chuanglo te chu ram lama hnathawk tura chhuah phalsak an ni lovang tih hriattir an ni bawk a ni.

Electrician, Thing leh Cement mistiri, mechanic, helper etc, te pawh an khaw VLTF te hriatpuina-a hna thawh phalsak an ni bawk. Khawzawl District-a luh leh chhuah khap chhunzawm zel ani a, tul bik thilah chuan phalna lak theih ani.

Office pawimawh a dawr turte chuan phalna lak hmasak thin tur a hriattir an ni a. Hmunkhata chawhmeh bazar-a thlai zawrh erawh khap chhunzawm rih ani a, VLTF te kaihhruaina in veng hrang hrang ten rem an ruat thei a ni.

Khawzawl District chhunga khua-te chu zone 9 ah then niin zonal officer 2 theuh ruat an ni a. Zonal officer-te hian an bial theuhte an fang chhuak vek tawh a, tun dinhmunah  nitin mamawh hrang hrangah harsatna lutuk nei an awm rih lo tih report dawn a ni.