22-Tuichang A/C Bialtu MLA, Deputy Chief Minister ni bawk Pu Tawnluia hmalaknaa UD&PA Department in Khawzawl khawpui chhunga hman tur bawlhhlawh paihna Motor a lei chu vawiin tlai dar 3:15 khan Khawzawl District Bawrhsap Pu Zothanmawia chuan Khawzawl Joint Village Council enkawl turin Joint Village Council President Pu Thangliana kutah Motor Chahbi, Document leh Motor inhlanna lehkhate a hlan.

Khawzawl District Bawrhsap chuan thu sawiin bialtu MLA, Deputy Chief Minister Pu Tawnluia'n Khawzawl khawpui mamawh tak mai Bawlhhlawh paihna Motor a ngaihtuah chu lawmawm a tih thu a sawi a. Bawlhhlawh paihna Motor chuan faina leh thianghlimna lamah Khawzawl khawpui tan hmasawnna a thlen chhoh zel a beisei thu sawiin, Khawzawl Joint VC kutah engkim a awm dawn avangin Joint VC hruaitute pawh Bawlhhlawh paihna Motor chu a neitu an nihna hre renga, uluk taka enkawl turin a chah nghal a ni.

He hun kaihruaitu Khawzawl District Urban Development Officer Pu James Lalnithanga chuan tunhnaiah Khawzawl khawpui chu Open Defecation Free Plus Town-a puan anih thu leh Khawzawl khawpui chhung veng hrang hrangahte vantlang zunram thiarna hmun, Community Toilet leh Public Toilet-te siam anih thu a tarlang tel bawk.

Khawzawl Joint VC President Pu Thangliana pawhin Bialtu MLA, Deputy Chief Minister ni bawk Pu Tawnluia hmalaknaa Khawzawl Joint VC in Khawzawl khawpui tana bawlhhlawh paihna Motor a neih tak avangin lawmthu a sawi bawk.

Bawlhhlawh paihna Motor hi Ashok Leyland siam a ni a, Central leh State-ah GST pek fel vek niin  Guwahati-ah bawlhhlawh paihna atana hman theih tura a Body siam fel vek anih hnuah a vaiin cheng nuai 16.85 senral a ni.

Vawiina UD&PA Department in Khawzawl DUDO Office kawt a Khawzawl Joint VC hnena Bawlhhlawh paihna Motor an hlannaah hian Khawzawl UD&PA Staff te bakah Khawzawl Joint VC hruaitute leh khawtlang hruaitute an tel a ni.