1706/2026-2027

Dated Khawzawl, the 8th August, 2026 : Nimin khan KVIC State Office, Aizawl leh KVK, Khawzawl tangkawpin Bee Keepers' Meet 2026 chu Khawzawl KVK Farmers Training Hall-ah neih a ni a, he hun hi Pu C. Lalremliana, Chairman, Mizoram KVI Board chuan khuallian niin a hmanpui. Bee Keepers' Meet hi Mizoram hmun hrang hrangah neih tur a ni a, hei hi kumina Mizorama neih hmasak berna a ni.

Khuallian Pu C. Lalremliana chuan thu sawiin Mizoram khaw hrang hrang a kalnaah Sawrkar atanga tanpuina hmuh beisei vang ni lo, an tuipui vanga mahni thiam ang anga Khuai khawi tamtak a hmuh thu leh heng mite hian amah pawh a ti phur tih a sawi a. KVIC chu tunhma chuan khuai khawitute tanpuina pe thin a nih thu leh hei hi tun thleng hian mi tamtakin KVIC an hmuh dan a ni, a ti a. Mizoramah chuan Cross Pollination avangin khuai hi thla chi 2 tharnan leh thlai chi thatna atana tangkai anih avangin Horticulture Department hi khuai chungchangah Nodal Department an ni tawh a, anni kaltlang lo chuan Project a siam theih tawh loh a, State Level Screening Committee-in Project an pass loh chuan National Bee Board-ah emaw Project a zuk tih ve theih loh thu a sawi.

Khuallian chuan CM Pu Lalduhoma'n khuai khawi a tuipui thu sawiin Mizorama Rubber ching hlawhtling tawh khuai khawi duh taktak te hming lakkhawmtirin KVIB Chairman hnenah hming 157 thehluh a ni a, heng mite behchhan hian Project siamin hemiah hian Vbc. 4.95 an hmu dawn tih a sawi a, tuna Bee Keepers' Meet neih pawh hi ala tangkai thei hle dawn tih a sawi a. Horticulture Department-te nen tangtlanga an Project siam chu National Bee Board-ah an thehlut a, hetah hian cheng nuai 94 vel an pe a, DPR-a awm ang chiahin Honey Processing Plant chu cheng nuai 68.88 hmangin a khawl leh hmanraw dangte an chah thu a sawi a. Khawizu thlitfimna khawl hi Zemabawk a KVI ramah bun fel tawhin Trial Run pawh an nei tawh tih a sawi bawk.

He hunah hian KVK Senior Scientist & Head Dr. Malsawmkimi pawhin thu sawiin Khawzawl District-a Khuai khawitute hmalak dante a tarlang a. Pi J. Zodinpuii, Asst. Director, State Office, KVIC in PPP hmangin Khuai khawitute hnenah KVIC hmalakna leh hnathawhte hrilhhriatna a nei bawk.

He hunah hian Khawzawl leh chhehvel khuate atangin Khuai khawi mi 45 vel an tel thei a ni.